Vawiin ni 31, March 2022 (Nilaithawhtanni) hian Mizo Hnam Run Lungleiah MNF President, Pu Zoramthanga chuan MZP Headuarters, Lunglei President kal chhuak ta Pu Lalrammuanawma, Congress atangin mi 112, BJP atangin mi 8, Neutral atangin mi 122, ZPM atangin mi 33, an vaiin mi 273 zet MNF-ah a lawmlut.
Lawmluhna thusawiin, “Zirlai hruaitu hlui duhawm tak tak leh mithar duhawm tak takin min rawn fin zel mai hi a lawmawmin, min tiphur takzet a, kan lawina tur Hnam Run pawh siam zauh hnathawh zel a ni dawn a ni. Chutiangin District dangah pawh siam belh zel a ni mek reng a ni. RD Block puanna hun hlimawm tak kan hmangzo chiah a, hmasawnna tharin a tuam mekte hlimna thawm kha a ngaihnawm takzet. Tlabung bial pawh MNF tan bial him a nih ngei kan beisei tawh a ni. MZU Southern Campus hawnna tur leh MPSC Lunglei lama hnathawk tur pawh a rang thei anga bawhzui a ni ang. Lunglei chhung kawng chhe zual lai thawmthat hna pawh thawk thuai turin kan inbuatsaih mek a, kawng pawimawh dang sial thar hna pawh thawh thuai a ni dawn a ni. Beisei phak loh Union Budget-a Aizawl Bypass road siamna tur leh link road siamna tur thailan a’n ni ngawt te hi thil lawmawm tak a ni,” a ti.
“2023 kuma Sawrkar leh tura rinna siam leh bengkhawn kawngah mipuiin MNF-ah rinna an nghat nasa hle a ni tih a lang mek zel a. Tun dinhmunah party dangin sawrkarna an siam ringa dahkham dah ngam hi an awm meuhin a rinawm loh. SEDP hmanga hmalakna liantham bul kan tan chhoh mek hian midang a tizam viau mai a, Movement an intih laia ZPM kalphung thar chu anmahniin an thlak zung zung avangin, mi tam takin Party-a inlet ta ZPM-ah rinna nghah a har an ti em em a ni. Ze ngai thlak thei lo, inthuamna chauh thlak chhente hi mipuiin an chungah rinna nghah ngam har an ti a ni. Hmana Pu Duha tho kha vawiina Pu Duha hi a lo la ni a. A hrechiang apiangin an tlansan zel mai a ni,” a ti bawk.
“Congress down lutuk hi a buaithlak a, dahkham chawi fur an ni ang tih hi a hlauhawm zawk a ni. An pu ber bu lum Serchhip By Election-a an Candidate halral thil hlana hlan a, dahkham an chawitir hian, Congress tlakchhiat tawhzia leh beidawn tawhzia a tichiang hle a ni. An beidawnna a kaltluan zel chuan Artelukawn mai an hlat lo a ni,” Pu Zorama chuan a ti bawk.
“Mizoram BJP lahin an pute hnenah min hek ngial mah se, kan Assembly House-ah ngei an pu, India Vice President chuan kan sawrkar fakna a rawn sawi lawi si a. Central-in kan sawrkar chungah rinna an nghat mai ni lovin, duhsaknain min vur mek zel bawk a. Selna tur dang hre loin Congress hun lai ata Contract hna thawk reng tawh hmangin min bei vel mai mai a ni,” a ti a.
MNF President chuan, “Zoram malsawmna haichhuakin, Pathian leh kan Ram tan ti zelin kan bei zel ang a, hman ata ram leh hnam tana kan engkim kan hlan ngam angin kan bei zel ang a, kum 60 zet min hruaitu Pathian hian engtikawng mahin kawng laklawhah min kalsan dawn lo a, Varparh Arsi chu a eng zual zel dawn a ni,” a ti.
Pu C. Lalrinsanga, Advider, MNF leh Minister ni bawk chuan thusawiin, “Kumtin mai min thlahthlam lova hun chep tak kara min tlawh reng maitu President leh Cm kan nei hi a lawmawmin, a vanneihthlak a, kan district hmasawnna tura RD block thar min pe hi kan lawm takzet bawk. Opposition bial pawh thliar hauh lova RD block thar 2 ngawt siam thar a ni hian thliar bik awm lova hmasawnna kairualtir a tumzia a tilang chiang hle a ni. RD block-in a ken tel thil lawmawm tak chu Horticulture leh Agriculture lamah Block Office dah a ni dawn a. A lawmawm takzet a, Hmasawnna min thlentir zeltu Cm chungah lawmthu kan sawi a ni,” a ti.
Pu Lalruatkima, Advider, MNF leh Minister ni bawk chuan thusawiin, “Hnam Party-a lawi tur lawmluh kan nei thar reng mai hi Chung lam malsawmna a ni a, Opposition atang leh Neutral atanga rawn lawilut awm zel hian belhtlak sawrkar kan neihzia a tilang a ni. Hun hmasa lama harsatna kawngchhia, sikul tan hma, zuruih leh zu avanga thihna tam tak sutkian mek zel a ni a, mipui hamthatna leh thlamuanna tura sawrkar ke penna hi miin an hmuhhmaih lo a, sawrkar hmasaa state dang police laka himlo kan zirlai hruaitute vawiina mipui humhim leh ramri venhim kawnga huai taka hmala ngam sawrkar an hmu a ni,” a ti a. “Congress sawrkar laia thleng ngai hauh lo Union Budget-a malsawmna thlen tura kan state thailan a’n ni bikte hi, kan CM kaihhruaina hi malsawmin a awm a ni. Central lama balu chunga bawk ang maia hniam salh salh Congress chu helamah pawh hniam lam an pan zel a, ZPM lam lah pawl bik insiam rengin an inthenhrang far hlawm a, hma an sawn lo mai ni lovin an kiam zel mai a ni. Lungrualna hmun Hnam party-a lo lawi zel turin thliar bik awm lovin Zoram mipuite kan insawm zel a ni,” a ti bawk.
Zingkarah Chief Minister hian Lunglei By Pass Road siamna tur hmunhma enfiahin, Central lamah DPR te siamin, tihhlawhtlin a nih thuai theihna tura hmalak chhunzawm a nih tur thu a sawi a, Aizawl atanga Lunglei panna kawng siam zawh tawh khuar lai leh siamthat ngaite siamtha turin he kawng enkawltu NHICDL hotute chu Circuit House Lungleiah koin, hma la nghal turin a hriattir nghal a ni.
