Nimin December ni 20, 2022 (Thawhlehni) leh vawiin 21 December 2022 (Nilaini) hian Tawi AC bialtu Pu R.Lalzirliana chuan a bial chhunga kum 80 chin chunglamte tan Christmas thil pek a hlan.
Minister chuan kalkhawmte hnenah thu sawiin, thlasik lo intan chho mekin, lo lam hna te zawh a ni chho a, chungkua a hun hmang turin mitin an inbuatsaih mek laiin Tlangsam leh Nipui te an par an lo chhuah bawk a, pangpar mawi tak tak ten nausen Isua pian hriatrengna leh lawmna tur atan an theihna nasa ber an chhuah bawk a. Hetih mek lai hian, then leh rual tam takten min peih loh sanin, a thenin mual an liam ta a, chung zawng zawngte chuan lung a tihlen zual thu sawiin, Upa te hlutzia tifiah tu a nihzia a tarlang. Upate hi an hlu em em a, kum lama upa ten kum hetiang chen an dampui thei chu a lawmawmin, Mizo ten upate hlutna an hre telh telh hi lawmawm a tih thu sawiin, bial chhungah kum 80 chin chunglam thahnem tak an la awm chu a lawmawmna tizualtu a nih thu a sawi. Thang leh thar lo la awm zel tur te pawhin upa te ngaih hlut nachang an hriat deuh deuh hi a pawimawh a tih thu a sawi bawk.
Bial tana a hmalakna langsar zual te zingah: Saitual to Hliappui road hman theih a ni ta te; Tualbung to Khanpui road a puitling ta te; Saitual khawpui chawm tura Tuivawl tui pump te mipui tana chhawrtheih a ni ta te leh District Hqrs in hmasawnna tam tak a rawn thlen ta te hi lawmawm a tihthu a tarlang bawk.
Thangthar lo la kal lehzel turte tana kawng sattu atana Pathianin he biala a dah hi lawmawm a tih thu sawiin, bialchhung mipuite duhsakna vanga hetiang dinhmuna ding thei hi a nih thu a sawi.
Minister hian a bial chhunga kum 80 chunglam mi 375 te hnenah Krismas thilpek Blanket (single) a hlan a ni.
