Ni hnih chhung awh tur Aizawl District Crime Review Meeting, 2025 chu vawiin khan SP, Aizawl Conference Hall-ah tan niin, he Crime Meeting hi naktuk thleng neih a ni ang.
Meeting hi Aizawl SP Rex Zarzoliana Vanchhawng chuan kaihhruaiin, Ashok Malik, IPS, DIG (Northern Range) in a hawng a. Meeting-ah hian Aizawl SP bakah, Aizawl District chhunga Sub-Divisional Police Officer (SDPO) -te, Police Station a Officer-in-Charge (OC)-te leh Investigating Officer (IO)-te an tel a ni.
Aizawl District chhunga Police Station hrang hrangah kumin January atanga June thla chhungin thubuai 818 ziahluh a ni a. Thubuai ziahluh atangin inrawk leh rukrukna a tam ber a, za zel a sawmruk leh panga (65%) a tling a ni. Rukruk thubuai za zel a sawmpali (14%) hi lirthei ruk thubuai a ni bawk. Thubuai ziahluh tawh zing a 107 chu Court-in chingfel tawhin heng zinga za a sawmriat leh pakua (89%) ah thil tisualtute thiamloh chantir an ni bawk.
Dan bawhchhiatna leh suahsualna hrang hrang laka mipuite kan inven a kan him theih nan Aizawl District Police chuan theihtawp chhuahin hma a la a. Hmun hrang hrangah dan leh hrai inzirtirna a buatsaih thin a ni. School leh College hrang hrang bakah Naupang Sunday School Inkhawm-ah te Awareness programme buatsaih thin a ni bawk. India ramah Dan thar (New Criminal Law) July ni 1, 2024 atanga hman tan a ni a, mipuite hnena hrilhhriat leh zirtir hna nasa takin kalpui a ni. Ruihhlo laka mipuite, abik takin thalaite kan him theih nan Drugs Awareness Campaign a buatsaih thin a. Hursualna leh hleilenna laka hmeichhiate leh naupangte an him theih nan inzirtirna hun vawi tam tak buatsaih a ni bawk. Kum 2025 chhungin dan leh hrai chungchang inzirtirna (Awareness programme) vawi 24 buatsaih tawh niin, mi 4895 hnenah zirtirna pek an ni.
Dan lova Mizoram rawn lut te endik hna Police Station hrang hrangten an thawk thin a. ILP nei lo emaw ILP dik lo a lo lut leh awmte check thin a ni. Kum 2025 chhungin ILP checking hi vawi 41 neih tawh niin dan bawhchhia mi 195 chu man an nih hnuah thuneitute hnen a hruai an ni tawh. Lirthei ruk Mizoram pawn a kalpui leh hralh a nih loh nan Police Station hrang hrangin zan lamah lirthei veivak endik hna an kalpui thin. Aizawl khawpuiah inrawk leh rukrukna laka mipuite kan him nan leh suahsualna hrang hrang laka mipuite venhim nan Police Station hrang hrang pali (4) te chuan an area theuhah zantin Police Patrolling an nei thin a, tunlai hian Police Patrol hi team 10 ah inthenin Aizawl khawpui hmun hrang hrangah zantin tlaivarin an duty thin a ni.
Aizawl khawpui chhunga Police Station hrang hrangte chuan CEIR (Central Equipment Identity Register) portal chu mobile phone bo chhuichhuah nan tangkai takin an hmang mek a. CEIR kaltlangin mobile phone bo 284 lai chhuichhuah niin, hengte hi mobile phone neitute hnenah hlan leh an ni. A ti tha ber Bawngkawn Police Station in CEIR kaltlangin mobile phone bo 143 chhuichhuak tawhin, a dawttu Aizawl Police Station mobile phone bo 104 an chhuichhuak tawh a. Mobile phone bo chhuichhuah kawngah hian C/35 Ramengmawii, Bawngkawn Police Station hian a mimalin a thawhhlawk em em a, a taimakna leh thawhrimna avangin thla li (4) chhung lekin mobile phone bo 120 a chhuichhuak a ni. A hna thawh that vangin vawiin khan chawimawina reward hlan a ni bawk.
