I&PR Minister, Aizawl West II bialtu MLA ni bawk Lalruatkima chuan a bial chhunga kum upa (kum 75 chin) hnenah blanket 1000 chuang a sem.
Blanket semna hun hi tukin khan Lalruatkima In Kanan Vengah neih a ni a. He hunah hian Lalruatkima chuan thusawiin, Upate chu hnam rohlu an nih thu a sawi a. “Kum upate hi an zahawm em em a, kan duatin kan theihna zawnah kan duhsak tur a ni. Kum 2 chhung hripui avanga kan buai hnuah boruak ṭha tak hnuaiah Krismas kan hmang dawn niin a lang a, a lawmawm hle a ni. He hun lawmawm lo thleng turah hian mi harsa zawk mulum zo lo an awm ang tih kan hlau a, beng min var sak turin kan ngen che u a ni,” a ti.
Minister chuan, “Theih tawp chhuahin sorkarin pawhin he hunpui hlim taka kan hman theih nan hian ṭan a la a. Ei leh bar lama harsatna kan tawh loh nan Supply Department lamin hma an la a, dan leh thupek kenkawh kawngah Excise leh Police lam pawhin CYMA leh NGO te hma an la mek zel a. He hunpui lo thleng hi him leh hlim taka hmang ṭheuh turin mipuite duhsakna ka hlan a ni,” a ti.
