Mizo Zirlai Pawl (MZP) General Headquarters chuan nimin khan MZP Conference Hall-ah kumin atana MZP Pisa Pui hawnna hun an hmang a, MZP Gen. Hqrs. Vice President Andrew F Lalramnghaka’n a kaihruai a, NESO Council Member Lalruatfela’n hunserh a hmang a, MZP Gen. Secretary Jacob Lalmuanpuia’n Pisa Pui khar a nih chhunga pawl hmalakna report a pe.
He huna thusawitu MZP President Lalnunmawia Pautu chuan, “NABARD 24 leh 25 kan enzui avangin rah tha a chhuahin kan hria a, NABARD 26 lo chhuak leh tur pawh hi a nihna tur dik taka hman a nih theih nan MZP chuan hma a la dawn a ni,” a ti a. “Mizoram chhung a Takam VC te’n an khuaa, a ram neitu Mizote nasa takin an nekchep an ni tih hriat a ni a. An thlavang hauh tur hian MZP chuan a thiam dan angin a enzuiin hma a la dawn a ni,” a ti bawk.
Lalnunmawia Pautu chuan, “Bangladesh leh Myanmar buaina avangin an sahimna zawnga Mizoram rawn bel tamtak an awm a, hengte hi mi fel ber leh tha ber an ni vek lova, hengah te hian ngaihthiamna zau tak nena kan unau rawn luttte kan lo dawnsawn a, hmangaih taka kan lo tuamhlawm a tul rih a ni,” a ti bawk.
MZP President chuan, “vawiina thalaite leh zirlaite lo hi chu nakina kan ram hruaitu tur kan awm lova, kan ram leh hnam hmangaihna kawngah hian kan intuhngheh sauh sauh a tul a ni,” a ti bawk.
MZP Adviser Hmingchungnunga chuan pawl hmalakna leh kal zelna turah kalkhawmte fuihna thu a sawi bawk.
MZP Computer Centre chu zirlai 70 velin computer an zir theih nana buatsaiha ruahmanna siam a ni a, session thar atan admission tih mek a ni a, zirna an tan thuai dawn a ni.
MZP Pisa Pui chu Mizo zirlaite leh ram leh hnam thila a mamawhtute tan engtiklai pawh a dawr theih leh belh theih turin a inhawng reng dawn a ni.
