District Level Narco Coordination Centre (NCORD) Committee, Champhai District thutkhawm vawithumna chu vawiin khan an Chairperson James Lalrinchhana, District Bawrhsap hovin DC Conference Hall-ah neih a ni.
Chairman James Lalrinchhana chuan Champhai District-ah ruihhlo do kawnga thawhhona tha tak a awm thin chu fakawm a tih thu sawiin, ramri depa awm Champhai District chu ruihhlo tawlhna kalkawng bulpui ber anih avangin tha thlah lova tanrual reng a ngai a ni, a ti a. Tunhnaia hlawm lian pui puia ruihhlo tawlh ruk man anih thu pawh sawiin, ruihhlo do nana thahnemngai taka tha thawhtute chhuanawm a tih thu a sawi bawk.
Convener Lalrinpuia Varte, SP Champhai chuan ruihhlo tawlh leh hmansual do let kawnga thawhhona tha tak chhawmnung zel a tul thu sawiin, District Level NCORD Committee hmalaknate kimchang taka report siama thuneitu sang zawk hnena thehluh thin a ni, a ti a. Ruihhlo chu ralthuam anga hmangin ram sum leh pai tichhiaa national security thlenga nghawh pawi thei thil anih avangin Sawrkarin a ngai thutak hle a ni, a ti bawk.
He hunah hian Champhai District Police leh Excise & Narcotics Department Champhaite hmalakna kaltlanga kumin chhunga ruihhlo man zat leh Narcotic Drugs and Psychotropic Substances Act (ND&PS Act), 1985 hnuaia case ziahluh dan tlangpui Addl. SP C.Lalengliana leh Asst. Commissioner of Excise & Narcotics Vanlalvura Ralte te hnen atangin ngaihthlak a ni a. SYMA President F.Lalrinmuana leh Assam Rifles OC Maj Akshay Dahiya te pawhin report an pe bawk.
Tarlan anih dan chuan January ni 1, 2022 atanga vawiin November ni 21, 2022 thlengin Champhai District Police-ten ND&PS Act, 1985 hnuaiah case 80 an ziaklut a, mi 104 man niin heng zinga 27 te hi ramdang mi an ni. Heroin hawng 2,102.23/gram 27,329 (kg 27.329) man niin, tualchhung market-a a hlut zawng cheng nuai 630.67 a ni a. Methamphetamine mum 8,18,500 (kg 84.05), a hlut zawng cheng nuai 1,637 man hu bakah Pseudoephedrine mum 1,80,000 (kg 28.80), cheng nuai 126 hu an man bawk. Ruihhlo man zawng zawng hlut zawng hi cheng nuai 2,393.67 a ni.
Excise & Narcotics Department Champhai te’n ND&PS Act, 1985 hnuaiah case 54 ziaklutin mi 60 an man a, heng zinga mi 17 te hi ramdang mi an ni. Heroin kg 8.614, tualchhung rate-a cheng nuai 103.37 man, Methamphetamine mum 4,65,700, cheng nuai 1,397 man, Pseudoephedrine mum 8,896, cheng 53,396 man, Ganja kg 3.2, cheng 3,840 man leh Alprazolam mum 218, cheng 2,180 hu an man bawk a. An man zawng zawng hlut zawng hi cheng nuai 1,501.06 vel a ni.
Ruihhlo tawlh leh zuar mante dan ang taka an phu tawk hremna pek zel an nih theih nan leh pawikhawih nawn awm leh thinte ven kawnga tanlak ngaite ngaihtuahho a ni a. Drug addict leh ruihhlo vanga man case neih dan leh chinfel lohte zirchianna neih ni se tih a ni bawk a. Thenawm ram buai avanga ruihhlo tawlh tunhma zawng aia a tam zual thu pawh he hunah hian tarlan niin, ruihhlo do leh man kawnga Force lam leh YMA te thawhrimna chhuanawm an ti a; tha thlah lova tanrual zel a tul thu tarlan a ni bawk. Heng bakah hian ruihhlo tawlh hluar chho zel ven leh do kawnga pawimawhte sawiho a ni bawk.
