Tun dinhmunah Mizoramah Covid hri kai mi 4 an awm mek a, kuminah Covid hri kai mi 11 an awm tawh a, mi 7-te chu enkawl dam an ni tawh.
Health & family welfare hnuai a integrated disease surveillance programme (IDSP) thuneitute sawi danin, karkalta Ningani khan Covid hri kai ni a rinhlelh mi 7 an endik zinga 1 chuan hri a kai tih hmuhchhuah a ni a, Zirtawpni khan mi 5 an endik zinga 2 chuan an kai tih hmuhchhuah leh niin, Inrinni khan 1-in a kai tih an hmuchhuak leh a. Covid hri kaite hi Aizawl district ami vek an ni.
Hri kai tih lang chhuak nasa an awm lova, damlo na tak leh enkawl zui ngai lutuk an awm lo bawk niin an sawi. Mizoramah hian kumina Covid hmuhchhuah leh hmasak ber chu May thla laihawla mi 2 hri an kai tih hmuhchhuahte kha an ni a. Anni dawtah hian June thla chho khan hmuhchhuah leh an awm bawk. Pathianni khan Covid inrinhlelh avanga thisen endik an awm lo niin IDSP hotute chuan an sawi.
Covid hri len vanglai, kum 2020 March thla chawhnu lam atanga intan kha nikumah kha chuan a zia-awm hle tawh a. Mizoramah chuan nikum chhung khan Covid hri kai mi 74 an awm a, nunna chan an awm lova, October thla atanga kumin May thla laihawl thleng khan hri kai hmuhchhuah an awm lo. Covid hri leng avang khan Mizoramah mi 734-in an thih phah a, kum 2021 kha thihpui tam ber kum niin mi 538 an thi a ni.
Mizoramah nimin thleng khan Covid hri kai leh kai lo sample 19,97,739 endik a ni tawh a, an zinga mi 2,39,646-te chuan hri an kai tih hmuhchhuah a ni a, mi 734-in thihpui-in mi 2,38,908 te chu an dam chhuak leh a ni.
