Kut themthiamna hi a hlu -MJA President

Aizawl: Mizoram Journalists’ Association President Pu Zonunsanga Khiangte chuan, “Kut themthiamna hi thil hlu tak, tuman an chhuhsak theih loh a ni,” a ti.
Ni 18.3.2022 (Zirtawpni) a Hnam Chhantu Pawl in hmunphiah siam ‘short course training on broom making’ kharna, Hnam Chhantu Pawl hmun Lengpui a neih a hmanpuinaah he thu hi sawiin Pu Zonunsanga Khiangte chuan, “Kut themthiamna hmanga hnathawh chu eizawnna tha tak a ni a, kan thiamna te tuma laksak theih a nih loh avangin taima taka kan thawh zel chuan Pathian malsawmna pawh kan dawng zel thin a ni,” a ti. Hnam Chhantu Pawl hnathawh chu fakin, “Mizoram leh Mizote tana an inpekna hi a fakawm tak zet a. Kut themthiamna lamah ngaihtuahna nasa tak an seng a, an kutchhuak hi India ram mai nilo ramdang a thleng hial tawh a ni,” tiin kut themthiamna chu tun ai hian sawrkarin ngaihsak lehzual se a duh tih a sawi bawk.
Tun tuma training chhuak te hi Chhiahtlang leh Keitum khuaa mi 9 an ni a. Heng mite hian kar khat chhung hmunphiah siam dan an training a, midang te training an la pechhawng leh dawn a ni.