Vawiin ni 28.02.2025 (Zirtawpni) chawhma dar 11 hian Mizo Hnam Run chhung inkhawm neih a ni a. He huna thusawitu Pu VL. Krosshnehzova chuan, “Kan hmanraw hriamber atana Pathianin MNF te min pek chu nationalism hi a ni a. Nationalism nunpui tlat hi MNF zepui a ni. Khawvel thiamna leh chakna, ropuinate hmanga he Zohnam hi nuaibo theih a nilo,” a ti.
Pu VL Krosshnehzova chuan, MNF te chuan Pathian hming kan lam hmasa thin a. Thenkhat tihdan anga tawlailirte ringa, sakawr chaknaa kan innghat anih chuan kan dingchhuak dawnlo. Ringlo mite pawh hian sum leh pai an sawichhuak thiam ve reng a, an hmang dik ve thei reng bawk, keini erawh chuan Pathianin chakna thahrui min pe thei a, min pe fo thin a ni. Chawimawi tur dik chawimawi ila, chhuan tur dik chhuang ang u. Ram leilung hlut ila, dimdawi ila, min chawmtu anih ang ngeiin i hmangaih let ve ang u, a ti.
MNF GS chuan, tunlaia sorkarin sawhthing a lei chungchangah, rim leh hah taka kuthna thawktuten dem an hlawh mai hi a makin a pawi hle mai. Rim taka thawktute avanga leitur nei thei mai zawk an ni a. A leitute an fimkhur tawklo zawk a ni mai lo maw? Zirtira kawhmuhtu tur zawkte hian an tihtur an tihloh avang hian dem tur zawk an ni a. Thawktute demlo hian, an zak anih chuan a changtu minister leh board chairman te hi bang ngam rawh se, a ti.
ZPM hi thuneihna duh avanga pawl hrang hrang atanga tlantau awmkhawm an ni a. An insawi anga awmloh hi an nihna tak a ni. He ram ro an relnaah hian Pathian ram a thleng em? tih zawhna hi mipuiin an la chhang ang, a ti bawk.
MNF in Pathian kan dah pawimawh ber a. British hnuaiah Zofate mitâng kan ni a. India lakah nghet lehzualin kan tâng leh a. Chumi lak ata zalenna dar vaw turin hnam pasalthaten nunna thapin an bei a, thisen tamtak a luangral a ni. Engtikah emaw chuan zalenna dar hi kan la khawng ngei ang, chutiang tur chuan hnam rilru puin MNF tan theihtawp i chhuah zel ang u, tiin party mipui kalkhawmte a fuih a ni.
