Thlahnih chhung Lai Autonomous District Council ah Sorkar a piantheihloh hnu ah vawiin khan United Legislature Party hruaitu, South Lungpher bialtu MDC, Congress Member C. Lalmuanthanga chu LADC Chief Executive Member atan Lawngtlai DC Cheemal Siva Gopal Reddy chuan LADC Hall, lawngtlai ah rinawmna thu tiamtirin a lalut.
CEM thar C.Lalmuanthanga chuan a kaihhruai Sorkar a piantheih nan a hmalatute chungah lawmthu sawiin, Mizoram Governor leh Chief Minister hmalakna chu fakawm a tih thu a sawi a, LADC ah huapzo, mipui sorkar kalpui a tum tih sawiin, langtlang taka Sorkar kalpui chu a tul tih sawiin, LADC Budget ringawt chu innghahna tham a nihloh vangin hmasawnna huamzauzawk dapchhuak tura tanlak a tul tih sawiin, helam hawi hi ngaihpawimawh zingah a telh tur thu a sawi.
CEM thar chuan Lairam mipuite, Kohhran leh Tlawmngaipawl te, Chanchinbumite chu ram hruaina ah a tulna apiangah thurawn pe a, khalhngil a ngaih pawha neitu chanchang turin a sawm.
CEM thar hian Deputy Leader atan Lungtian bialtu MDC, Sanghuliana a ruat thu a puang a, a thahwpuitur Executive Member dangte pawh a tihfel thuai a rinawm.
CEM lakluhna ah hian MLA.pathum, Dr.Lorrain Lalpekliana Chinzah, C.Ngunlianchunga leh Robert Romawia Royte bak ah Congress leh MNF hruaitute, Kohhran leh NGO hruaitute, State leh LADC.a mipawimawh te an tel.
Tarlan thin angin LADC ah hian March 7, 2024 atangin Sorkar mumal a kaltheihloh hnu ah Congress MDC pakhat leh MNF MDC 12 ten United Legislature Party dinin, C.Lalmuanthanga kaihhruaina hnuaiah LADC ah Sorkar thar a piang chho ta a ni.
Chief Executive Member thar hian vawiin khan a Office luahnghalin Pathian hnen ah inhlanna hun hman a ni a, hemi hnu hian Lai District Congress Committee Office leh MNF District Hqrs Lawngtlai Office a tlawh nghal a ni.
