Lai District Congress Committee chuan thuchhuah siamin, “Tunlaia Lai District Council dinhmun leh a hnuaia thawktute harsatna namen lo an tawkta mai hi pawi kan ti a. Hetianga mahni sahmim puarna tur leh Lalna duh luat avanga Lai District mipui leh Party candidate an nih theihna tur a tana sponsor tu party pawh zah zo lo a, MNF MDC thenkhat ten ZPM leh BJP an zawm a vanga Lai District mipuite tawrhna an thlen zozai hi Lai DCC chuan pawi a tiin zahthlak a ti takzet a ni,” an ti.
Lai District Congress Committee chuan, “Lai DCC chuan Lairam mipuite hnenah heng MDC te hian ngaihdam dil ngei turin a phut a ni. Politics hi mahni chhungkhat laina leh duhsak zawng chauh hamthatna tur a ni lo a, ram leh mipui rawngbawlna a ni tih hi heng MDC te hian lo hre thar leh turin kan chah a.
“Hetiang anga a lema ram hmangaih dera, ram hruai tumtute hi an bial mipuite pawhin lo thlang nawn tawh loh turin Lai DCC chuan a ngen a ni. Kan ram mipui hi harsa leh rethei tete awm khawm kan nih avangin tuten emaw damdawi, ruih theih thil zuara mi thisen leh nunna hmanga an sumdawng ang hian politics hmanga sumdawnna tlak kan ni lo tih lo hria se tih kan duh a. Hetiang taka zuang lawra kan District Council sorkar ti buai tawh lo turin kan ngen tak meuh a ni.
“Tin, Pu Lalduhoma Mizoram Chief Minister District Council buainaa a bul tumtu ber a ni a. MNF MDC te thlema thu tam tak tiamtu pawh Pu Lalduhoma hi a ni, vote a mamawh laia a thu sawi nen chuan a nun zia hi a inpersan hle a ni. Tin, Pu Lalduhoma leh a kaihhruai ZPM Party hi tuten emaw BJP mawng zawm leh an pawisa hial an hman avanga BJP party hlau em em anga an sawi kha Lai DCC chuan LADC chunga thil thlen dan a ngaihtuah hian a dik niin a ngai a.
“Mizoram Governor V.K Singh-an State BJP hotu tute emaw thusawi/dictate ni awm tak anga ngaihtheih veka order siama lehkha a chhuah ta mai hi zahthlak a ti a. LADC inrelbawlna dan leh dun pawh zahpahna nei hauh loa Constitution venghim tur bera ruatin LADC CCB Rules a pal zut ta mai hi Mizoram Governor ni tlakah a ngai lo a, a mah avanga LADC thawktu leh mipui ten harsatna nasa kan tawk hi a rang lama a sut kian dan tur zawng turin kan phut tlat a ni. Hetiang Governor puitling lo tak Mizoram in a nei hi vanduai thlak kan ti takzet a ni.
“Hetih lai vek hian, Mizoram sorkar a nodal/link department DC&MA department kal tlang loa Governor Secretariat atanga LADC lama lehkha an chhuah ta maite han hmuh hian, DC&MA Minister Pu Lalsawivunga leh Pu Lalduhoma Chief Minister hian LADC an ngaihsak loh zia leh tih takzeta an enkawl loh zia a ti lang chiang hlein kan hria a. BJP ho sum an hman vang em ni heti taka Governor hi an hlauh chhan tih hi kan zawhna a ni. Heng ang thil hi LADC ah a thlen vawikhatna niin Lai DCC chuan a hria a, Lai fate hi min duhsak loin, engah min ngai lo a nih pawhin tun aia ngaihsakna lan tira thu kal lam leh haw lam te hre tawh turin leh an mahphurhna hlen chhuak thin turin a chah nghal a ni. Tuna LADC dinhmun hi nhgaihsak ni sela pumpelhin mipui harsatna hi sut kian theih a ni. Heng thil hi ZPM sorkar nep lutuk vanga thleng vek a ni.
“MLA a ngaihna hria, ram leh hnam tan a nih chuan a huna tlawm ngam, a huna huaisen taka ke pen mai thin Pu C.Ngunlianchunga kan nei hi vannei kan in tiin, ropui kan ti a. LADC hnuaia thawktute hlawh lak a nih theih nana theihtawp chhuaha hma a lak a vanga hetianga thawktu ten hlawh an la thei hi lawmawm kan ti a. Pu C.Ngunlianchunga hmalak fe tawh hnua hma lak nachang hre ve chauh, anmahni hmalakna vanga hlawh pawh hmu anga insawia thu inchuh nia ngaih theih tura social media lama ZPM MLA pakhat leh MNF MDC te leh LADC CEM te chungchang post a awm thin pawh hi thil mawi lo leh zahthlak tak niin Lai DCC chuan a ngai a ni.
“Lai District mipuite pawhin Congress Party sorkar ah lo chuan kan ram himna leh hmasawnna a awm loh zia hre thar leh ila, kan hma lawka LADC Election lo awm turah pawh Congress Party te thu neihna pe leh ngei turin kan ngen tak meuh a ni e. Politics hi inlemtekhualna tur a ni lo tih i hre thar leh ang u.
“A tawp berah chuan tuna LADC term kal lai hi Term vanduai leh khawngaihthlak tak niin a ngai a. Hetianga taka hun tawite chauh awm tawh pawh Lal duhna avanga MDC te sapatal duhna hi mipui tawrhna en hian pawi a ti a. Chuvangin Lairam mipui tam zawkte duh dan ang hian he term kal lai hi thiah/dissolve ni mai se, a thara election neih vat a nih theih nan ZPM sorkar hian hma la se a ti a. BJP party hi an hlau tawpkhawk a nih loh chuan Pu Lalduhoma leh a kaihhruai hian LADC buaina hi ching fel thuai turin leh thawktute hlawh hi pe turin kan phut a ni,” an ti bawk.
