Tunhnaia Lai Autonomous District Council (LADC) Chief Executive Member V. Zirsanga hova Executive Committee thukhawm chuan thil pawimawh hrang hrang an rel a. LADC hnuaia Village Council Member-te chu anmahni chenna in chu House Tax an awl phalsak an ni a. Bungtlang South-I Village Council ten an dil angin an khaw hming Bungtlang South-I chu Bungtlang South tia thlâk rem tih a ni a; Ngengpuikai Farmer Producer Company-in Seed-cum-Demonstration Farm, Mampui ram atanga hectare 4-a zau Pass siamsak tura an dilna chu a thuphungin remtih a ni a; hei hi a khawihtu Department-in thu delhkilh leh pawimawh lo siam se tih a ni.
Solid Waste Management chungchanga hmalakna kalzelah LADC Office hrang hrang leh LADC buatsaih puipun khawmna reng rengah Plastic-a siam bottle hman khap ni se, tih a ni a. LADC Golden Jubilee puala Volley Ball Tournament buatsaih rem tih a ni a. Lawngtlai-V Primary School chu Council Veng Primary School-I tia a hming thlak rem tih a ni a; LADC hnuaiah Law Committee mumal tak din ni se an ti a, Law Committee Secretary atan GAD Joint Secretary ni se, an ti bawk.
Dan anga Middle School din phalna dil School 7-te chu an dil angin phalna pek an ni a. Chungte chu : New Vision English School, Hmunlai; New Vision English School, Saibawh; New Vision English School, Tuichawngtlang; Baptist English School, Diltlang South; Synod Home Mission School, Kawrthindeng; Peniel Comprehensive School, Sabualtlang leh John F. Kennedy English School te an ni a. Primary School din phalna dil School 22 te erawh a hmuna zir chian phawt ni se, an ti.
