Tunkar Thawhlehni a LADC Chief Executive Member atana lakluh United Legislature Party hruaitu C.Lalmuanthanga chuan vawiin khan LADC Session ah CEM rintawkna a paltlang.
LADC ah thlahnih chhung Sorkar a piantheihloh hnu ah Congress Member pakhat leh MNF Member 12 ten an din United Legislature Party hruaitu, Congress Member C.Lalmuanthanga chu vawiin khan LADC Session ah CEM rintawkna Vote of Confidence neih niin, he hun a tel Elected MDC 18 atangin CEM ringtawk Member 12 awmin a kalh zawngin Member 6 in ban an phar a, Chairman V.L.Hmuaka chuan CEM C.Lalmuanthanga’n CEM rintawkna a paltlang tih House ah a puang.
CEM thar C.Lalmuanthanga chuan LADC ah mipui banphak sorkar din a tulthu sawiin, Party pahnihin an siam Sorkar nimahse, Party bil leh thunei bik awmchuanglo, hmasawnna atana thatur ah chuan mimal thuneihna kalsana, a tamzawkin tha an tihlam ah Sorkar chu a kal dawn a ni a ti a, CEM atan rintawkna a paltlang vangin lawmthu a sawi a, Member te chu ram rorelna ah amah finchhuah thin turin a sawm.
Vawiin Session ah hian Deputy CEM (Designated) Sanghuliana Mualchin, T.Zakunga leh V.Zirsanga ten CEM thar lawmpuina thu sawiin duhsakna an hlan.
