Aizawl May 10: Vawiin chawhnu dar 2 khan Mizoram Legislative Assembly kum 50 tlin lawmna kal zelah Assembly House Annexe Conference Hall-ah Legislators’ Joint Meeting neih a ni a, Hon’ble Speaker Pu Lalrinliana Sailo chuan he hun hi a kaihruai a ni.
He hunah hian Chief Minister Pu Zoramthanga chuan Mizoram Legislative Assembly Speaker hmasa ber Pu Dr. H. Thansanga hnenah chawimawina thilpek a hlan a. Deputy Chief Minister Pu Tawnluia chuan Assembly Speaker pali na Dr. Kenneth Chawngliana chu chawimawina thilpek a hlan bawk a. Deputy Speaker Er. Lalrinawma chuan Assembly Speaker lo ni tawh leh Minister ni mek Pu Lalchamliana hnenah chawimawina thilpek a hlan bawk a. Parliamentary Affairs Minister Pu T.J Lalnuntluanga’n Pu R. Romawia hnenah chawimawina thilpek a hlan bawk a ni.
Deputy Chief Minister Pu Tawnluia’n Mizoram Legislative Assembly Golden Jubilee Souvenir a tlangzarh a.
Legislator hmasa ber zinga pathum lokal Pu Chawngkunga, Pu K. Sangchum leh Pu Sapliana Vandir te hnenah chawimawina hlan a ni.
FLAM aiawh in an President Pu Liansuama’n thu sawiin Mizoram Legislative Assembly Golden Jubilee lawmnaah a lailum lai ber duhsak taka an chantir thin avangin lawmthu a sawi a, FLAM member 97 an awm thu a tarlang a.
He hunah hian kum 1972 atanga kum 2022 inkara Legislator lo ni tawh leh ni mek ten hun hlimawm tak an hmang a ni.
