Vawiin ni 14.7.2025 hian Mizoram Pradesh Congress Committee chuan Congress Bhavan-ah Monday Devotion leh Political Session an hmang a, he huna thusawitu Lalhmingthanga Pachuau, President, ADCC chuan, “Kan hotuten kan ram hi tih takzetin an lo kaihruai tawh thin a, chuvangin kan ram hian tun dinhmun hi a thleng thei a ni. Kan ram tun dinhmun a lo thlen theih nana pawimawh em em chu Pu Lal Thanhawla’n lalthuthleng a kian kha a ni. Kha vang khan kan ramin leirem a rah theih phah a ni.
“Congress sawrkar vangin mi tam takin rangva in an neih phah a, khatih hun laia Mizo mipuite rangva in chung tur nei pha lo te tan khan a hlu em em a ni. NLUP vangin mi tam takin eizawnna bul tanna tur an dawng a, bul an tan theih phah a, mi tam takin an hlawhtlinpui a ni.
“Tuna kan President hian Minister a nih lai khan Medical College, MIMER kan tih mai kha an din a. A hnu ah tuten emaw in a hming an thlak a nih kha. Lengpui Airport pawh hi kan hotuten an din ani a, mahse mi thenkhatin lan mawi te, chak ni a lan duh ten hralh te an tum leh a, hengte hi thil zahthlak tak a ni.
“Kan ramin hma a sawn lo tih te hi thu belhchian dawl lo tak a ni. Hun kal tawhah khan kan hotute khan thil tam tak an lo ti tawh a, tun dinhmun hi kan thleng thei a ni. Kan sawrkar hrawn mek hian sawrkar kal tawh te tihsa sawihnawm hi a tih theih tawk ani a, enkawl pawh enkawl zui hleithei lo a ni. Heng hi mipui hian an hrethiam tawh a, ‘Congress nge nge kha an lo tha ber’ an ti tan tawh a ni.
“Mipuite hian Congress chuan kan thutiam kan hlen thin tih an hria, hruaitu tha leh rintlak, dawt sawi ve ngailo kan nei bawk a, mipuite hian rorel leh tura an beisei ber kan ni leh tawh a ni. Kan hotute hi kan ringtawk a, kan ram kaihruai leh turin an tha ber ani tih hi kan pawm tlat a ni.” a ti
He programme hi MPCC Media Department Chairman Lalremruata Renthlei chuan a kaihruai a, Lalremruata (Marema), Revival Speaker chuan Pathian thuchah a sawi bawk a ni.
