Aizawl April 20 : Tuivawl bialtu MLA Pu Lalchhandama Ralte chuan a bial tlawhchhuah programme a hmang mek a. A bial chhung khaw hrang hrangah MNF party zawm thar a lawmlut pah zel bawk niin vawiinah MNF Party thuchhuah chuan a tarlang.
Vawiin hian Darlawn MNF Group buatsaih, ‘Mithar lawmluh programme’ Block Resource Centre, Darlawnah hmanpuiin, MNF party zawm thar voter 250 a lawmlut a, tun ṭum a bial fanna mithar a lawmluh zawng zawngte hi voter 545 an ni. Pu Lalchhandama Ralte chuan thusawiin, “MNF flagship programme SEDP hi mipui thleng phakin kan kalpui ṭan thei ta hi a lawmawm hle mai. Hripui vangin kan duh anga hmalakna kan kalpui thei lo erawh hrehawm kan ti em em a, hun ṭha a rawn her chhuak ṭan hi mipuite tan a lawmawm kan ti. SEDP kalpui dan tur chungchangah kan party mite ka ngen duh che u chu, he programme kan kalpuina turah hian hmeithai leh pachhiate hi i ngai pawimawh hmasa ang u,” a ti.
Pu Chhante chuan, “MNF hi Hnam Movement nena inzawm tlat a nih avangin Mizo mipui thinlungah a tla na ber a, tunah pawh hian Mizoram hmun tinah MNF zawm thar an awm reng a, hei hian a entir chu MNF party hi Pathianin Mizo mipuite enkawl tur hian hriak a thih mek a ni. Chuvangin, kum 2023-a inthlanpui lo awm leh turah pawh hian MNF hi kan sawrkar leh ngei dawn,” a ti bawk.
Pu Lalchhandama Ralte chuan kan elpui ber pahnih te hi mipui rilruah an tlahniam zel a ti. Congress party chuan thahrui an lakna ber Delhi lam a tlabal zo tawh a, thahrui an nei thei tawh lo a. An tan thawhleh ngaihna a awm rih lo a ni a ti. ZPM dinhmun sawiin, “ZPM nihphung hmuhfiah nan chuan MADC election lo awm turah sawn a lang chiang MADC bial 25-ah bial 8 chiah an chuh ve ngam a, hei hian ZPM sum tetzia a lantir a, Pathian belruat an ni rih lo a ni ang,” a ti bawk.
