Laldenga thlanah zahna lantir

Aizawl, July 7 : MNF Founder President Pu Laldenga (L) thih champha vawi 32-na pualin tukin zing khan a thlan, Aizawl Treasury Square-ah hun hman a ni a. MNF President leh Chief Minister Zoramthanga hovin Laldenga zahna chibai an buk a, a thlanah pangpar an dah a, inkhawm tawi program an hmang bawk.
Laldenga thlana inkhawmah hian MNF President Zoramthanga chuan Pu Laldenga thihcham vawi 32-naa tel zawng zawngte chibai a buk a, “Pu Laldenga hova bultan MNF chu kum 1966 atang tawh khan a ral leh mai ang, thisen chhuah hmang an ni, tiin politician-ten an sawi thin. Amaherawhchu, Mizoramah tualto party tlo lo tam tak karah MNF chuan kum 60 hmel a hmu thei ta a ni.
“Jet fighter, armour car, laipui, machine gun leh politics nen kawng tinrengin MNF chuan beih a tawk a. Mahse Pathian kaihhruainain a thiltum tihlawhtling turin mal a sawm a. Tualto party dangte chu kum 10 pawh daih lo tam tak an awm tawh a. Chu’ng karah chuan MNF chu vawiin thlengin a la parvul zel,” a ti a. “Pu Laldenga thihchamah hian kan din chhan (Pathian leh kan ram tan) hi a tehkhawnga hmangin harsatna karah pawh i ding zel ang u,” tiin kalkhawmte a sawm.
He hunah hian Pu Laldenga (L) nupui MNF Adviser Pi Lalbiakdiki pawhin thutawi sawiin, Pu Laldenga chawimawia a awm chu lawmawm a ti a. A thlan chunga chawimawinate chu Pu Denga pawh khan a beisei phak a rin ngai loh thu a sawi.
Pu Laldenga thlana inkhawm tawi hi Lalthlengliana, MNF Vice President-in a kaihruai a. Dr. Lalzama, Ex Minister-in hunserh a hmang a. MNF hotute leh Pu Denga ngaisangtuten a thlanah hian zahna pangpar an dah bawk a ni.
He hunah hian MNF Sr. Vice President Tawnluia, MNF Elected OB-te, Minister/MLA-te, PAC, NCC, Adviser, AMC Mayor/Dy Mayor/Councillor, General Secretary-te, MADC hotute, Ex-MNA leh MNF party hruaitu thahnem tak an tel a ni.
Pu Laldenga hi July 11, 1927-ah Lunglei Pukpui khuaah a lo piang a, kum 1944-ah British Indian Army a zawm. Kum 1959-ah Mizo National Famine Front chu a hova din niin, chu pawl chu October 22, 1961-ah Mizo National Front (MNF) tiin thlak a ni.
Laldenga hi kum 1986 khan Mizoram sorkar lailawk (interim)-ah Chief Minister a ni a, kum 1987-a Mizoram state Assembly inthlan hmasa berah Sateek leh Aizawl North-II bial a?anga thlan tlin a ni a, state nih hnua Chief Minister hmasa ber a ni.
Kum 1990 khan Cancer a nih hriatchhuah a ni a, Memorial Sloan Kettering Cancer Centre, USA-ah thla thum enkawl a nih hnuin Mizoram pana an haw kawng Ashford Hospital, London-ah July 7, 1990, India sanaa tlai dar 2:30-ah a thi.
Pu Denga ruang hi July 11, 1990 tlai dar 4:30-ah Tuirial Airfield-ah helicopter-in phurh thlen a ni a, July 13-ah vui niin, Mizote zinga state funeral-a vui awm chhun a la ni.