Lalremsiami, Birmingham 2022, Commonwealth Games-a Women’s Hockey Bronze Medal latu chuan vawiin khan Mizoram a rawn thleng a. Sports & Youth Affairs Board Vice Chairman TC Pachhunga, Sports & Youth Services Department Secretary Dr Lalrozama, Sawrkar mi pawimawhte, Sports Discipline hrang hranga infiammite, Sports Assn. hrang hranga hruaitute leh mipui thahnem takin Lengpui Airport-ah an lo hmuak a ni.
Lalremsiami hmuahna inkhawm tawi Lengpui Airport hungchhunga chawlhbukah buatsaih a ni a. He hunah hian Sports & Youth Affairs Board Vice Chairman TC Pachhunga chuan Lalremsiami hlawhtlinna a chhuanawm tih sawiin a hlawhtlinna phena thil pawimawh tak tak a tawrhchhelna, tumruhna, huaisenna, mahni invawntheihna leh Pathian a tihna chu thangtharte leh infiammite chotu, phurna petu ni ngei se, a nuna entawn tlak awmte hi inzirnan hmang se a duh thu a sawi a. Mizoramin Commonwealth Games-ah India aiawh turin infiammi pahnih Lalremsiami leh Jeremy Lalrinnunga te India ram aiawh turin kan tir chhuak a, hlawhtlinna changin medal an rawn hawn ve ve a, za ah za (100%) in hlawhtlinna kan chang a, khawvel pum huap infiamnaah Mizo thalai infiammite hlawhtlinna ropui taka chang an pun belh zel kan beisei tlat a ni, a ti a. Mizoram sawrkarin rei rial lovin anni pahnih lawmpuina leh chawimawina hun a buatsaih thuai dawn tih a sawi bawk.
CWG 2022 Women’s Hockey Bronze Medalist Lalremsiami pawhin amah hmuahna programme-ah hian thu a sawi a. A hlawhtlinna te Mizoram mipuiin an lo lawmpui a, sawrkarin a puala inhmuahna hun a buatsaih chu ropui a tih thu a sawi a. A medal rawn hawn chu ama ta bik a nih loh thu leh Mizote ta liau liau a nih thu sawiin, a tana mipuite tawngtaina leh an duhsakna zawng zawngah lawmthu a sawi bawk a ni.
Lalremsiami hmuahna programme tawiah hian Dr Lalrozama, Secretary, SYS chuan inlawmna thu a sawi a. He hunah hian Sports & Youth Services Department, Mizoram Olympic Association, Mizoram State Sports Council, USAM, Hockey Mizoram, Sports Authority of India, Central YMA, Govt. Hrangbana College leh Sports Association hrang hrangin Lalremsiami hnenah hian lawmpuina pangpar leh thuziak te an hlan a ni. Reception programme neih zawhah hian Lalremsiami chuan Chanchinbumite hmachhawnin zawhna hrang hrang te a chhang chhunzawm a, hemi hnu hian an khua Kolasib panin a chhuak a ni.
Lalremsiami hian tlai lamah DC Circuit House, Kolasib thlengin, Thomas D.Lalengliana, President, Sub-headquarters YMA, Kolasib chuan hun kaihruaiin tlawmngai pawl hrang hrangten lawmpuina thil pek an hlan a ni.
Kolasib Deputy Commissioner Pu John LT Sanga chuan Remsiami hlawhtlinna avanga zofaten hmingthat an hlawh thin chu ropui a tih thu sawiin a hlawhtlinna phen a tumruhnate, thawhrimna leh taimaknate chu mizo thalaiten entawn nachang an hriat thar a pawimawh thu a sawi a. Thalaite tan infiamna lam ah hmasawnna turin khelmual changtlung tak tak thahnem tak a awm tawh thu leh a tui mi te leh dinchhuah tum mi te tan kawng a inhawn reng thu sawiin hlawhtling tur a bei te tan malsawmna a awm thin thu a sawi.
