Hachhek bial fanga zin mek Lalrindika Ralte, MLA chuan vawiin khan Sihthiang, Saikhawthlir leh Chuhvel khua a tlawh.
A mah lo dawngsawngtu Party mite, khawtlang hruaitute hmaah thu sawiin, “Khawvela kan chen chhungin politics hi kan tlanchhiat san thei lo. Politics hian kan nitin nun hi min nghawng a. Politics ?haah chuan mipui rilru a dik a, mipuite an thla a muang thin. Nimahsela, politics ?ha loah chuan mipui rilru a dik thei lo va, kan thlarau nun a vaw chhia a. Inpawngnekna leh a huai huai din channa a nih avangin politics tha lo chuan a chhe zawngin mipuiah nghawng a nei lian em em a ni. Politics a nih avangin dawt hi i sawi lovang u. Kei hian dawt ka hrilh lovang che u, ka bum ve lo ang che u. Tin, mi tha hi kan bial tan kan thlang tur a ni. Kei aia tha zawk an awm a nih chuan chu chu vote tlin mai tur. Mi ?ha hi an hlu ber,” a ti bawk.
Sorkar kal danin a rilru a tih nat thin thu sawiin, “Chhungkaw pa chu nupui fanaute tana innghahna, hna thawktu tur a ni. Sorkar pawh mipuite tan pa a ni a, mipuite innghahna tur a ni. Mipui harsatna pawh sorkar chuan a chinfel saktu tur a ni. Tuna kan sorkar hrawn mekte erawh hi chuan a mipuite tan harsatna min siam sak zawk hi a pawi ka tiin a na ka ti tak zet. Hetiang em em a sorkar tha lo hi Mizoramin kan la hrawn ngai lo. Pawl dang hi sawi chhiat ngawr ngawr ka tum lo, kan ram kaldan erawh chuan lung a ti awi lo a, ka sawi lo thei lo a ni. Hmangaihna leh induhsak tawnna nen kan ram rawng kan bawl anga, sorkar tha hi kan siam tur a ni,” a ti bawk.
Sorkar tha kan mamawh zia leh MNF sorkar nawn hlauhawm zia sawiin, “Sorkar tha hi kan mamawh tawh. Kan duh a ni satliah lo, kan mamawh a ni. Sorkar tha siam turin Congress Party kan inbuatsaih mek a. Keini lo chu MNF sorkar paihthla thei an awm dawn chuang lo, kan ram leh hnam chhan turin theihtawp kan chhuah a ngai a ni. MNF hi kan sorkar nawn tir a nih chuan kan ram hi siamthat tur awm lo khawpin an sawpchhe hman ang tih a hlauhawm. Hun ?ha kan nei, sorkarna thlak turin theihtawpin hna i thawk ang u,” a ti.
Vawiina a bial fannah hian Larindika Ralte, MLA hian mi thar 7, MNF 5 leh BJP 2 chu Congress Party-ah a lawmlut bawk.
