Lalrindika Ralte, Hachhek bialtu MLA chuan a a bial chhung leh Mizoram khawthlang lama Kuhva chingtuten Kuhva rah hralhna kawnga harsatna nasa tak an tawh chungchangah hma la turin vawiin November 7, 2022 (Thawhtanni) hian India ram Prime Minister hnenah Memorandum a thehlut. Memorandum hi Prime Minister Office, New Delhi-ah email hmanga thehluh a ni
Prime Minister hnena Memorandum a thehluhah hian Lalrindika Ralte chuan Hachhek bial chu Mizorama kuhva tharchhuak tam ber a nih thu sawiin, a bial mipui zaa sawm sarih bawr vel (70%) zet chuan Kuhva chinga ei zawng an ni tih a sawi.
Lalrindika Ralte chuan tun hnaiah Myanmar atangin Kuhva ro alo lut nasa tih sawiin, Union Home Ministry meuh in rawlhin dan lova Kuhva a sumdawnna chu titawp turin Mizoram leh Manipur sorkar a hriat tir a. Heti chung hian Kuhva tawlhruk ti tawp tura Mizoram Sorkar hmalakna chuan beisei a pha lo hle a, dan lo a kuhva sumdawnna hi vawiin thlenga tih tawp a la nilo a ni. Hetih mek lai hian Assam sorkar chuan Myanmar Kuhva an state chhunga lut tur chu khauh takin an veng ve mek bawk a. Hemi an venna kawngah hian Mizoram chhunga thar Kuhva rah te chu Myanmar atanga lokal anga ngaiin an dang ta vek a ni. Hetiang a nih avang hian Mizorama Kuhva chingtute chuan an Kuhva chin an hralh thei ta lo a ni.
Myanmar atanga Kuhva tawlhruk titawp tura chak zawka hma la tur leh, Mizorama kuhva chingtuten an Kuhva rah tharte an hralh theih nana hma min lak sak turin ka ngen che a ni a ti.
India ram Prime Minister hnena Memorandum a thehluh rual hian Lalrindika Ralte, MLA chuan a bial mipuite hnenah hetiang hian thuchah a tichhuak bawk.
HACHHEK BIAL MIPUI HNENA A THUCHAH
Mizoram hmun hrang hrang leh a bikin ka bial chhung, Hachhek Constituency a Kuhva chingtuten Kuhva rah hralhna kawnga harsatna nasa tak an tawk hi a pawi ka ti a, a rang thei ang bera chinfel nise ka duh takzet a ni.
Duhamna hi danin a thunun loh chuan mi rethei zawkten an tawrh phah thin a. Mi duham tlemte thunun lohte avanga he harsatna pawh hi tawk kan ni. Mahni mihring puite pawhin tuar dawn mah sela pawi ti lo khawpa mahni hma sial an awm hi a pawi hle bawk a ni.
He hun thim leh hun harsa hian engtik niah emaw chuan min kiansan dawn a ni tih hre chungin kan inpumkhatna ti chhe thei zawngin emaw, he harsatna behchhana thu dik lo leh dawt hmanga inbeihna te, mimal inhuatna awm thei tur zawngin emaw tumahin hma la lo turin mitin ka ngen a. Kan rilru pawhin chutiang chu suangtuah lo se ka duh.
He harsatna hian Kuhva chingtute mai bakah kan khawtlang nun thlengin min nghawng vek a. Chuvangin, kan zavaia that tlanna turin harsatna kan tawh lai hian thawh hona tha tak nei chungin keimahni a theihna sang ber theuh i hlan ang u.
He harsatna kan tawh mek hi tumahin Politics-a hamthatna atana an hman loh nan te, pawl leh mimalin hamthatna atana an hman theih lohna turin Kohhran miten kan harsatna chingfel theitu, engkim ti thei Pathian hnenah tanpuina kan dil a tul bawkin ka hria.
