Vawiin May 29, 2023 a Hrangtûrzo West Block Conference, Khawlailung Community Hall-a neihah Lalsawta, Congress Party President chuan Hrangtûrzo bial chhung Khawlailung, Keiṭum, Hmunzawl, Piler, Bungtlang leh Chekawn aṭangin mi thar MNF – 59 , ZPM – 42, Neutral – 5, an zavaiin mi 106 te chu lawm takin Congress Party tana nghet taka awm tûrin a lawm lut a. Lawmluh zingah hian Saithangpuia, President MNF Unit-V, Khawlailung ni lai leh a chhungte, Lalṭhazuala, Treasurer MNF Unit-1 ni lai leh a chhungte an tel bawk a ni.
Lalsawta chuan, “ZPM hian kalphung thar tih hi an sawi fo a, a sawia sawi ai chuan a taka tih a pawimawh zawk. Kei pawh hi Pu Lal Thanhawla’n President ni ve tawh rawh se min ti a. Khawi daikil kara mi nge tih pawh in hriat loh kha President ka rawn ni ve ngawt a, chu chu kalphung thar chu a ni. Hruaitu ṭhain hruaitu ṭha dang a chher chhuak ṭhin a. Inthlak danglamna (change) a lo thleng a nih hi!” a ti.
Lalsawta chuan, “Nitin kan ṭawngṭainaah ‘I ram lo thleng rawh se’ tih kan chham ṭhin a. Kan ramah hian Pathian ram tak tak a lo thleng em? Pathianin ram ṭha min pe a, mihring ṭha min pe bawk a. Mipuiin kan nghah mek chu Sorkar Tha a ni. He Sorkar Tha pe tur che u hian Congress Party hian kawng dik kan kawhhmuh che u a, kan hnenah hian lo kal zel rawh u tiin mipui kan sawm che u a ni”
“Kum 2023 MLA General Election-ah hian Party dangte nen kan intlansiak dawn a. Sorkarna siam kan tum a, sorkar satliah ni lovin sorkar ṭha siam ngei kan tum a ni. Candidate hausa ringawt kan thlang dawn lova, mi dik leh mi rinawm, ram leh hnam tana a ṭha ber ber kan rawn vawrh chhuak dawn a. Campaign-na tura chêng nuai 200, nuai 300 ka nei tawh ti ho te hi chu Congress Party hian ti beidawng teh ang u. Kumin hi a bulṭanna atan hmang ila, sum hmanga Vote lei tumte chu lo ti zak ula, lo hnawl ngam zel turin ka ngen che u a, hetiang mihring hi Mizoramin a mamawh lo a ni,” a ti.
Lalsawta chuan, “Tang puihna hi kan sem dawn lo a, kan pe dawn a ni. Ṭang tak takte kan pui dawn a. Kan ṭan tam poh leh kan ram a ṭha ang a, kan thawhchhuah a lo tam ang a, ramin hma a sawn phah dawn a ni. Phai aṭanga chawhmeh rawn lut zawng zawngte hi kan enfiah ang a, intodelh dan kan zawng ang. Kan Manifesto no. 1 angin mizo hnam hi hnathawk hnam ni turin kan siam ang a, mi taima hlawhtlinna atan chuan Congress Party chuan sum (budget) kan dah dawn a, thil harsa a ni reng reng lo a, kan ti ang kan tih chu kan ti tak tak dawn a ni,” a ti bawk.
Hrangturzo West Block Congress Conference a kalkhawm te hian a hnuai a mi ang hian Resolution an passed a ni :
1) MPCC President Pu Lalsawta’n Mizoram Pradesh Congress Committee (MPCC) a kaihhruai dan hi ṭha kan tiin kan ring tawk a. Mizoram tana a hmathlir hi Congress Party tan chauh ni lo, Mizoram tana ṭha, hmasawnna thlen thei tur leh dinchhuah pui tham niah kan ngai a ni. Chuvangin, sokar ṭha siam tura Pu Lalsawta kaihhruaina hnuaia lungrual taka theihtawp chhuaha hmalak zel nise kan ti.
2) Kum 2023 MLA General Election lo awm turah Hrangturzo biala ding tur kan hotuten an rawn dah apiang lawm takin kan pawm a, an tlin ngei theih nan theihtawp kan chhuah ang.
He hun hi Pu RC Rinzuala, President Hrangturzo ‘W’ BCC chuan a kaihruai a. Thanglianchhunga, Jt. Secy HTZ ‘W’ BCC chuan hunserh hmangin; Lalroenga Gen. Secy MPCC, Lalhmingthanga Pachuau President ADCC leh Laltawnliana Sailo President MPYCC te’n thu an sawi bawk a. Lalenkawli Pautu, Mimi Remruatsangi leh Lalhmunengi te chuan kalkhawm mipui zaiin an awi a. MPCC President Lalsawta hi MPCC, ADCC leh MPYCC hruaitu mi ṭhahnem takin an ṭawiawm bawk a ni.
