Nizan khan ZPM Mamit Central Block huaihawtin VC Hall, Mamit Bazar vengah vantlang inkhawm neih a ni a; Pu Lalduhoma, Leader leh K Sapdanga, Working President ten an hmanpui a, block huamchhung atangin mi thar 623 an lawmlut a ni. ZPM hruaitute hi General Headquarters hruaitu dangten an tawiawm a ni.
Lalduhoma chuan, “Mamit district chhunga Langkaih, Teirei leh Tut luipui phai ten eibar tling khawp leilung hausakna an nei a; hmun thenkhat phei chu kalpahin kan thlithlai uluk hle a ni. Heng luipui ngheng khuate nen hian multi-purpose project duang turin remchang kan dap dawn a, eng berah nge chung project-te chu kan kaltir ang tih lo inhmakhawsuih turin kan hruaitute pawh kan inrawn zel a ni,” a ti a. “Zirchianna nen kum hnih chhung kan buatsaih hnuah Policy kan peih tawh a; he district sik leh sa mil zawng tak thlai awmsa te, kan thiamsa leilung behchhan eizawnna ten ZPM policy-ah hmun pawimawh tak an luah a ni,” a ti.
ZPM Leader chuan, “Kan ram dinthar leh nan tiin kan theihtawp kan chhuah a, kan Working President nen Zoram dung leh vang, chhak leh thlangah kan suartluan reng a, kan hruaitu dangte pawh an thawkrim hle. Ningani chawhnu dar 1 apiangin office-a awm remchang apiangte ZPM tan ni lo, kan ram tan kan tawngtai thin a, kan minister pension te leh kan rawngbawltu ten min kaihruai thin a ni. He tawngtaina hi in awmna hmun atangin, a remchan dan ang anga min lo zawm turin leh, min lo tawngtaisak fo turin kan sawm che u a ni,” a ti bawk.
K Sapdanga chuan, “Kan hotuten Vangpui Fehchhuah buatsaihin Zoram dung leh vang kan fang mek a, report atanga a landan leh kan party-in hma kan sawn dan ngaihtuahin kan lawm em em a ni. Tunah hian Assembly House-ah opposition party lian ber kan lo ni ta a, party dangte hian phuahchawp nen nasa takin min bei a, a ṭhente phei hi chu mizo leh mizo inbeih nan chuan a uchuak mah mah em aw tih tur hial a ni. Amaherawhchu, hêng min beihnate hi mipuiten an awih hauh lo a ni tih mipui sukthlek atangin a hriat theih a ni,” a ti.
ZPM Working President chuan, “Chunglam malsawmna kan dawng nasa; kan hotuten hmun hrang hrang an tlawh kual a, kaphung thar mipui sawrkar din turin mipuite kan insingsa mup mup niin kan hria. Tunhnaiah kan Bru unaute zingah pawh he harhna hi a thleng mek a, thil lawmawm tak mai chu heng kan Bru unaute hi kaphung thar hmang hmasa tute zingah an tel nghal a ni. Candidate sum eiraltu nih tum lovin an theihtawpin kuhva hmun samin an inhlawh thin a ni,” a ti a. “Kan mi thar duhawm tak takte hi a then chu politics la ngaihtuah ngai reng reng lo, neutral zingah pawh kalphung thar hi Zoramah tundin nise tih avanga beiseina nena kan party-ah an rawn lut a, ZPM hi beiseina thar neitute kalkhawm kan ni,” a ti bawk.
He hun hi V Lalbiaktlinga Sailo, President chuan kaihruaiin Upa CL Thantluanga, Vice Preisdent, District MPF chuan hunserh a hmang a; Block Secretary report ngaihthlak niin H.Lalchamliana, Vice President chuan lawmthu a sawi a; party mi thahnem tak an tel a ni.
