Larsap Hari Babu Kambhampati in RTI Week 2022 hawng

Larsap Hari Babu Kambhampati chuan vawiin khan Conference Hall, Assembly annexe-ah Right to Information(RTI) Week, 2022 a hawng.
DAA, SPIO leh SAPIO te chu sawm an nih angin an tel tha hle a. CIC leh IC lo ni tawh te pawh an tel a ni. He hunah hian Larsap hnen atangin fuihna thu ngaihthlak a ni a. Mizoram Information Commission lam atangin Chief Information Commissioner leh Information Commission ten thu an sawi a. RTI Activists lam atangin fuihna thu leh tanlak ngai lai te ngaihthlak a ni bawk.
Larsap Hari Babu Kambhampati chuan RTI Week 2022 hman a nil eh thei ta chu lawmawm a tih thu a sawi a. RTI Act hman a nih tan dan te, mipui sawrkara thuhneitute khalhngilna atana a tangkaina te leh langtlang sawrkar a awm theihna atana a pawimawhna te pawh a sawi bawk a ni.
Larsap chuan RTI tangkaina te a sawi rualin hman sual a nih theih thu a sawi a. A tha lo zawng leh mi mal inbeihna atana hmang lo turin mipuite leh RTI hmangtute pawhin mawh an phur a ni a ti.
MIC chuan hna a thawk tha hle tih a sawi a. Kuntim Assembly a pharh tura Annual Reports te a hun takah an buatsaih thin chu a lawmawm hle a ni a ti. MIC hmalakna leh a thawhpui GAD leh ICT te inpekna a zarah Online RTI Application hman a nit a chua hmasawnna a nih thu a sawi a. Hei hian RTI diltute zinga Office pan harsat deuh te tan awlsamna a siam sak mek a; sum leh pai bakah hun hlu tak, RTI dilna atana sen ngai thin pawh a ti ziaawm sawt dawn a ni a ti. RTI chu sawrkar khalh ngil na atan khua leh tui ten phur takin hmang zel se a duh thu a sawi bawk. MIC lam pawh hna tha chhunzawm zel tura fuih in RTI chungchanga mipui zirtirna pawh uar zawka buatsaih chhunzawm zel turin a chah a. RTI Week district tinah hlung taka hmang turin he RTI week hmanna tura inbuatsaih mek te duhsakna a hlan bawk a ni.
Lalnunmawia Chuaungo, Chief Information Commission hnen atangin kalkhawmte inlawmna thuchah ngaihthlak niin RTI Week 2022 hawnna inkhawm hi tan a ni a. CIC chuan DAA, SPIO leh SAPIO te tan lan chhunzawm turin a fuih a. RTI online a in ziaklut lo te pawh a rang lama inziak lut turin a chah bawk a ni. Suo Motu disclosure under RTI Act in a phut angin Department tin te chu website nei tur leh website ah mipui hriattur thil te RTI hmanga zawh kher ngai lova tarlang vek tur an nih tih a sawi a. Hei hi Department tam zawkin an zawm tawh a; la tarlang lo te pawh tarlang thuai tura hriattir an ni a ti. CIC chuan RTI chu sawrkar hnathawkte thil tih diklo zawnchhuahna atana siam a ni lova, sawrkar tha leh langtlang a awm theihna tura hmanraw tangkai tak a ni a, RTI hna chu hna chuangliam a ni lova, sawrkar hna pangai tho a ni a ti.
RTI hmangtu langsar tak pahnih Vanneihthanga Vanchhawng leh Lalnuntawma Fanai te pawhin he hunah hian RTI dilna kawnga an thil tawn te an sawi a. Sawrkar hnathawkte in enfiah a tul na ngai lai te sawiin RTI hnathawk tha an lo awm avanga mipui tana thil tangkai tak tak information an haichhuah a nih chungchang te an sawi a ni. RTI chhanna pehhel lutuk leh dilnawn fo ngai an awm thin te chu pawi an tih thu an sawi a. Dilna te tha taka chhang thin tur leh chhanna pek hun chhungah huntiam bawh pel tepa chhanna tikhawtlai thin lo turin ngenna an siam bawk.
He hunah hian RTI Week denchhena a Slogan Writing Competition buatsaih taka College zirlai lawman dawngtute hnanah Larsap in lawman a hlan a. Zomuanpuia Khiangte, 1st Sem, Deptt of Commerce, Govt HBC, Vanlalhriatpuia, 3rd Sem, Deptt of Mizo, PUC leh David Lalchhandama, 5th Sem, PUC ten pakhatna, pahnihna leh pathumna an hauh a ni.
RTI Week, 2022 hawnna programme hi Zorammawia, Information Commissioner, MIC chuan lawmthu sawiin a khar a ni.