Assam Regiment dinchamphaphak (Raising Day) vawi 84-na pualin vawiin khan programme hman a ni a. He ni pual hian Mizoram Larsap, General (Dr) Vijay Kumar Singh, PVSM, AVSM, YSM (Retd) chuan War Memorial, Treasury Square, Aizawlah Assam Regiment sipai huaisen, ram tana nun hlantute zahna leh hriatrengna lantir nan pangpar a dah a. A ni bakah hian Mizoram Ex-Services Leaque (MESL), Assam Regiment leh Assam Rifles hotute pawhin zahna pangpar an dah bawk.
Hemi hnu hian AR Ground, Aizawlah Assam Regiment Raising Day pualin thingpui inhona leh inkawmhona hun hman zui a ni a. He hunah hian Larsap General (Dr) Vijay Kumar Singh chuan Assam Regiment-te chu an dinchamphaphak pualin duhsakna a hlan a. Ram tana rawng an bawl tawhnate chhuanawm tiin, tha taka chhawmnung zel turin a fuih a ni.
Lt Col Clement Lalhmingthanga (Retd.), MLA & President, MESL chuan hun hlu tak senga Assam Regiment-te dinchamphaphak hmanpuitu Larsap chungah lawmthu sawiin, programme changtlung tak buatsaihtu Assam Rifles-te chungah lawmthu a sawi bawk.
Hun hmanah hian Brig Pushpendar Sorayan, DIG, HQ 23 Sector Assam Rifles; Lt Col ZS Zuala, Patron, MESL; Padma Shri Awardee Hav Lalbiakthanga, President, World War-II Veterans Association bakah MESL member-te, Assam Regiment leh Assam Rifles-te an tel a ni.
