Larsap Dr. Haribabu Kambhampati chuan vawiin khan Bawngkawn South a awm, thalai te skill development training hmun Medhavi Foundation Centre a tlawh a, he centre hnuaia Deendayal Antyodaya Yojana-National Urban Livelihoods Mission (DAY NULM) kaltlanga thalai 24, ei leh in siam course ‘Commis Chef’ zo te hnenah certificate a hlan bawk a ni. Pu Lalramsanga Sailo, Secretary, Labour, Employment, Skill Development & Entrepreneurship in Larsap hi a tawiawmin hun a hmanpui bawk a ni.
Larsap Dr. Haribabu Kambhampati chuan Medhavi Foundation Centre a tlawhna chhan te sawiin, training hrang hrang in kalpui te, heng in kalpui dante, in centre atanga training zo ten hna an hmuh dante hriat te, training hmang tangkai a mahnia eizawnna bultan awmte dinhmun te ka hriat duh avangin ka lo kal a ni, a ti a. Skill Development chungchang sawiin Larsap chuan training te chu a tih thei mai a, mahse a pawimawh ber chu training zo ten hna an hmuh emaw, hmani kutkea dinga eizawnna bultanna emaw an neih hi a ni a, hei hi Sawrkar Laipui Scheme Pradhan Mantri Kaushal Vikas Yojana (PMKVY) in a tum ber pawh a ni, a ti. Service sector ah bik takin phaia hotel leh damdawiin ah te Mizo thalai hnathawk an tam nia a hriat thusawiin heng sector ah te hian Mizo leh Hmarchhak state dang thalai te chawr nuam an ti a, hna a awm reng a mahse hemi atan mahni inlum kalsana hmun danga awm an inkau a ngai niin a sawi. Larsap hian he hunah Commis Chef course zo thalai te pawh kawmin an an kal zel dan tur te a zawt a ni.
Pu Kuldip Sharma, Director, Medhavi Foundation leh Pro Chancellor Medhavi Skills University Sikkim in an Foundation leh an University in skill development lama hma an lak dan, hemi kawnga industry te nena an thawhho dan tlangpuite a sawi a. Pu Vanlalkima, Centre Manager, Medhavi Foundation Aizawl in Mizoram skill development training hrang hrang an lo buatsaih tawh te leh an chanchin tlangpui a sawi a ni.
Medhavi Foundation hian kum 2019 khan Mizorama skill development zirna leh training te buaipuiin Mizo thalai 800 chuang skill development training an pe tawh a, heng zinga tam tak chu Mizoram leh Mizoram pawnah te hna an hmuhsak a ni. Medhavi Foundation Centre Aizawl hi Mizorama Pradhan Mantri Kaushal Kendra (PMKK) Centre puitling awmchhun niin Hmarchhaka hetiang centre hi 11 an nei mek a, Sikkim ah Medhavi Skills University hming chawiin University an din bawk a ni.
