Larsap Hari Babu Kambhampati chuan vawiin khan Nightingale Care Services (Home Healthcare) – in lama damlo, tar chaklo leh enkawl ngai te enkawltu tur training na chu a zirna hmun Jay Jay Training & Placement Solutions, Falkland Veng, Aizawlah a hawng a. Nightingale Care Services (Home Healthcare) hnuaia training batch hmasa ber te hnenah certificate a hlan nghal bawk a ni.
Larsap Hari Babu Kambhampati chuan Jay Jay TPS in kum 10 chhunga hma alo lak tawh naah, thalai tam takin ram chhungah leh ram pawnah hna an hmuh theih phah a. Hei hi thil lawmawm tak a ni a, helam hawi zawng hian LESDE leh a training partner dangte pawhin skill training course dang te pawh siam belh zel se, thalai tam takin eizawnna an neih phah dawn a ni a ti. Kan hriat theuh angin sawrkar hnathawh tur chu tlem te a ni a, kumtin thalai lehkhathiam an awm belh zel a, eizawnna kawng dapin hnathawh tur an mamawh a. Mizoramah ringawt hnathawh tur zawng loa state pawn leh ram pawn lama hnathawhtur tam tak awm mek te kan thalaite an ngaihven a hun tawh a. Heng state pawn leh rampawn lama hnathawh tur te hi kan thalai ten an thawh theih nan vocational training leh skill development training tha tak kan pek a ngai a ni a ti.
Rampawna hnathawh tur zawngte hnena hnah hmuh sak thei nia in sawi lemchang tam tam tak an awm tih erawh hriat a pawimawh takzet tih a sawi a. Heng Fake Agency te hi awihawm takin an insawi thin avangin mi tam takin bum tawkin harsatna an tawh phah tawh a. Hnazawng te chuan Fake Placement Agency te thangkamah an awh lohna turin Hna pethei nia insawi nazawng te chu ring nghal mai loa an zirchian hmasak thin a ngai a. A thaberah erawh chuan sawrkarin a pawmpui Agency ngei pan a tha a ti a. Mizoramah pawh rampawna hnathawh tur zawnsak thei awm chhun leh Ministry of External Affairs in license a pek thlap Jay Jay TPS Aizawlah a lo awm hi thil lawmawm tak a ni a ti a. Jay Jay TPS hotute pawh theihtawp chhuah chhunzawm a, skill training dang te pawh mamawh dan mil zela siam belh turin a chah a ni.
Jay Jay TPs hi kum 2011 khan din a ni a; tunah hian helai hmun atang hian mi 600 chuang an training chhuak tawh a. Training chhuak tawh zinga mi 400 vel hi hna hmuhsak an ni tawh bawk a ni. Tunah hian Jay Jay TPS-ah hian zirlai 140 hosteller anga awmin training an nei thei tawh a. Nightingale Care Services (Home Healthcare), thla thum a rei, training bik hi North Eastern Council(NEC) hnuaia hmalakna a ni a. He Training course hi Indian Institute of Entrepreneurship(IIE) duan niin, certificate pawh hi IEE pek a ni a. Batch hmasaber-ah hian mi 26 ten hlawhtling takin training an nei tawh a. Heng zinga a tam zawk hi ram pawn – UK, Singapore, Gulf leh hmundangah te Healthcare Giver hna hmu tawhin an kalna tur buaipui mek an ni. Batch 2-nah hian 21 an awm mek a. Nakkum January hian Batch 3-na atan admission hawn a ni leh dawn a ni. Vawiin program-ah hian training chhuak ten an training chungchang leh an hnathawh tur chungchangah te report an pe a. An hnathawh tur an zawm hnuah hian ei in leh awmna man chawi lovin thlatin Rs 80,000/- bawr atangin bul an tan ang.
Nightingale Care Services hawnna program-ah hian training chungchangah report D.Eich Thanga, Manager, Jay Jay TPS ngaihthlak a ni a. He hunah hian Angela Zothanpuii, Director, LESDE chuan Larsap a rawn tawiawm a. Jervis Nghaka Chhakchhuak, Proprietor, Jay Jay TPS hnen atangin Jay Jay TPS hmachhawp leh training dang an kalpui tum chungchang te report ngaihthlak a ni bawk.
