Larsap-in uluk taka ramri veng zawm turin BSF a fuih

Binay Kumar Jha, IGP of BSF(Mizoram & Cachar) chuan vawiin khan Raj Bhavanah Larsap Hari Babu Kambhampati a hmu a.Mizoram chhung bika BSF te hnathawh tlangpui te Larsap hnenah hian a report a ni.
Shri Binay Kumar Jha, IGP of BSF chuan Larsap Hari Babu Kambhampati hnenah hian BSF te hnathawh pawimawh ber chu India ramri venhim hna a ni tih a sawi a. Ramri ven hna thawh bakah BSF te chuan an hun tha te an camp leh post awmna bula cheng te tih hmasawnna atan program hrang hrang siamin an hmang thin tih a sawi bawk. BSF te chuan an inkulhna bula khawtual mi te nena inlaichinna thatak an siam zel a. Thalaite hnenah pawh India ram inpumkhatna pawimawhna te sawiin Sipai a tan pawimawhna leh hamthatnate uar takin an sawi thin a ni a ti.
Larsap Hari Babu Kambhampati chuan Mizoram chhim lamah leh khawthlang lamah te BSF in ramri ven hna pawimawh tak an thawk mek a. An an thawk tha hle nia a hriat thu sawiin IGP BSF hnenah hian lawmthu sawiin uluk taka ramri ven hna thawk chhunzawm turin a fuih a ni.
BSF ten an hna pawimawh ber ramri venhim hna tha taka an thawh bakah an inkulhna hmuna tualchhungmi te tih hmasawn leh tanpui kawngah an thawk tha hle tih a sawi a. 131 Bn BSF ten tanpui ngai te tanpui leh chhawmdawl ngai te chhawmdawl kawngah Pu KS Nautiyal, Commandant hovin hna an thawk tha takzet a ni a ti. IGP of BSF hnenah hian 131 Bn BSF Commandant leh a thawhpui officer leh jawan te hnathawh that lawmpuina leh hriatpuina ni pah fawmin Governor chuan Letter of Appreciation a hlan nghal bawk.