Larsap leh JICA Survey Team ten MSSSCRC sak dan tur sawi

Aizawl June 6 : Japan atanga lo kal, Survey Team, Japan International Cooperation Agency (JICA) leh an thawhpuite chuan vawiin khan Raj Bhavan-ah Larsap Hari Babu Kambhampati an kawm a.
JICA Survey team chuan Mizoram State Super-Specialty Cancer and Research Centre (MSSSCRC) sakna thawh thuai a nih theih nan Survey uluk takin an tan tawh tih an sawi a; Mizoram sawrkar leh mipui thlawpna te an hmalaknaah te an la mamawh belh tur thu te Governor hnenah hian an thlen a ni.
Larsap nena inkawmnaah hian JICA survey team aiawhin Hiroshi Ako, Team Lead of JICA Survey Team, Nula Hanako Miyoshi, Expert, Hospital Management, Dr Ranga, IT Consultant Survey Team leh Dr Lalbiakmawia Ngente, Consultant, Survey Team te an tel a ni.
JICA Survey Team aiawhin Hiroshi Ako, Team Lead JICA Survey Team chuan Survey an kalpui dan te, MSSSCRC sak an tum dan te, MSSSCRC sak zawh hmaa State Sawrkar lam atanga a thawktu tur lo lak leh thil pawimawh dang lo chinfel ngai chungchang te leh he project kaihhnawih a hriattur pawimawh te a sawifiah a. MSSSCRC project chu a tha thei ang bera duan a nih thu te, an uluk thu te leh project siam chhungin state sawrkar leh mipui lam atanga thlawpna an la mamawh zel tur chungchangte pawh a sawi a. Central Sawrkar dawr a tul hunah pawh a tul anga Governor puihna pawh an la mamawh tur thu a sawi bawk a ni.
Larsap Hari Babu Kambhampati chuan Mizoram mipui ten Cancer Damdawi In thabik a neih theihna tur sum leh thluak sengtu JICA official te leh JICA Survey team chungah Mizoram mipui aiawhin lawm thu a sawi a. JICA team te chu Zoram mipui leh sawrkar chuan an hmalaknaah thlawp tlat an tum a, state sawrkar lam atanga tihtur tul te pawh Mizoram sawrkar chuan tha taka a tih tur thu a sawi a ni. Larsap chuan vanduai thlak takin Mizoramah cancer vei an tam hle a; heng cancer vei zinga a tam zawk hi damdawi in changtlung zawk – Delhi, Mumbai, Vellore, Kolkata leh hmundangah te kalpui an ngai tlangpui a. Cancer inekawlna senso a hautak thei hle a, MSSSCRC sak zawh hunah erawh chuan cancer vei te tana senso sang lutuk chu a ziaawm tawh dawn hle a ni a ti. Mizoram mipuiin he Cancer Damdawi In changtlung tak hi mamawhna a san tawh a vangin a hun taka sak zawh hmana, hman thuai kan nghak hlel hle a ni a ti bawk.
JICA Survey Team ten report an pek dan chuan tunah hian Survey hna kalpui mek a ni a; hei hian kum 2 emaw a la duh tura chhut a ni a. Kum 2028 kum tawpah chuan MSSSCRC hi a mamawhtute tana hman theih a peihfel beisei a ni.