Vawiin August ni 29, 2023 (Thawhlehni) khân Mizoram EIACP Hub – Mizoram Pollution Control Board (MPCB), Govt. Hrangbana College Eco Club leh I.T.I Vêng Local Council tangkawpte chuan Mission LiFE (Lifestyle for Environment) hnuaia hmalâkna pakhat atân Lawibual Lui thianfaiin an hnatlâng a, mi 80 vêl an thawkchhuak a, Lawibual lui hi I.T.I Vêng Local Council huam chhûnga awm niin Chite Lui fintu a ni.
He hunah hian Benjamin Lalnunsanga Colney, Programme Officer, Mizoram EIACP Hub chuan Mission LiFE chungchâng sawifiahin Mission LiFE chu India kaihhruai khawvêl pum huap hmalâkna (global mass movement), mimal leh khawtlâng anga kan nitin nunphung leh nun dân te, kan chhehvêl leilung nena inhne rem tura inthlâk danglam tura inzirtirna leh inkaihhruaina a nih thu a sawi. Lawibual lui hi August 2022 khân Central Pollution Control Board (CPCB) chuan lui thianghlim lo ‘Polluted Rivers’ a puan zingah a tel thu târ lang bawkin, hemi a nih avâng hian Mizoram EIACP Hub chuan mipuite hnênah kan chhehvêl lui tuite thian faia uluk taka humhalh leh thianghlim taka enkawl a pawimawhzia inzirtirna ni pahfâwm turin ‘Lawibual lui thenfai hnatlâng’ hi buatsaih a nih thu a sawi a, hnatlânga thawkchhuakte chu kan chhehvêl leilung leh boruak humhalh kawngah tûn aia nasa-a ke pên zêl turin a sâwm bawk a ni.
Lawibual Lui thenfai hnatlânga thawkchhuak zawng zawngte hian Mission LiFE ‘Thutiam’ lâkna nei nghalin he hun hi R. Lalrinfeli, Information Officer, Mizoram EIACP Hub chuan a kaihhruai a, kan chhehvêl Environment humhim tur leh chumi atâna nunphung thlâk danglam ngaite pawh thlâk danglam turin hnatlânga thawkchhuakte hian intiam tharna an nei a ni.
