Mizoram Journalists’ Association (MJA), Lawngtlai District chuan vawiin khan Lawngtlai Press Club-ah annual conference, 2023 an hmang a. Lawngtlai Bawrhsap, District MJA Patron ni bawk Amol Srivastava chuan Khuallian niin hun a hmanpui.
District MJA annual conference hi chawhma lamah rorela hun hman a ni a. Chawhnu hun District MJA Vice President Elvis Lalthangzuala kaihhruaiah Khuallian Amol Srivastava chuan District MJA te annual conference chibai bukin, duhsakna a hlan a. District MJA member-te nen inpawhna ṭha tak neia hna an thawh thu leh kawng hrang hrangah an thlawpna a dawng ṭha hle tih sawiin, lawm thu a sawi a. Journalist-te chu sawrkar leh mipui inkar thlun zawmtu, sawrkar hma lakna hrang hrang mipui hnen a thlen theih nana hmanraw pawimawh tak an nih angin, sawrkar inrelbawlna felfai a awm theih nan theih tawpa sawrkar thawhpui zel turin a sawm a. District MJA te chu hmasawn zel tura duhsakna hlanin, annual conference lawmpuina pawisa fai a hlan bawk.
Khual zahawm, MJA General Headquarters-a Treasurer C. Lalhmachhuana chuan Lawngtlai District MJA te ṭan rualna leh hma lakna chhuanawm a tih thu sawiin, General Headquarters leh District dang tan pawha kawng tam taka entawn tlak leh hmahruaitu an nih ṭhinna chu chhunzawm zel turin a chah a. Khawvel nunphung danglam chak tak leh, a bik takin social media lar zelah inthlahdah mai lova intuai hriam zel tur leh hma sawn zel tum turin District MJA member kal khawmte chu a fuih a ni.
Chawhnu hunah hian Presbyterian Church of India-a Lawngtlai Bialtu Pastor Rev. K. Zalawma’n hunserh a hmang a. District MJA President Lalngheta Ralte chuan President Speech sawiin, journalist-te chu mi chunga leng emaw, mi hnuaia awm emaw an ni lo va, official-te tana hlauh tur pawh an ni lo tih a sawi a. Ram leh hnam siam kawnga official-te tana thawhpui theih journalist nih tum reng tur leh rin tlaka thawk zel turin District MJA member-te chu a chah a ni.
District MJA General Secretary Lalchharliana hnen aṭangin kum 2022 – 23 (kum khat) chhunga District MJA te chetna leh hma lakna report ngaihthlak a ni a. Lawngtlai DIPRO C. Lalhruaitluanga hnen aṭangin thu sawi ngaihthlak ni bawkin, Chhawkhlei Times Editor FC Vanlalzawna’n lawm thu sawiin hun a khar a ni.
MJA annual conference-ah hian transfer-a chhuak tur, District MJA Patron, Lawngtlai Bawrhsap Amol Srivastava thlahna hun hman nghal a ni a. District MJA aṭanga “Ngaihhruina” thuziak chu District MJA Treasurer H. Lalrinmawia’n Patron kutah hian a hlan a ni.
Vawiina an annual conference rorelah hian MJA Lawngtlai District chuan heti ang hian resolution siamin, an pass a ni:
“Sawrkar laipui hmalaknaa Mizoram chhim lam kawngpui siam ṭhat mek a ni hi lawmawm kan ti a, kawngpui rotling kan neih theih nan hna thawktute’n rin tlakin thawk se kan ti.”
Vawiina MJA Lawngtlai District annual conference hi MJA General Headquarters aṭangin Treasurer C. Lalhmachhuana (Khual zahawm) leh Finance Secretary Joseph Lalnuntluanga te’n an hmanpui a ni.
