Vawiin chawhnu dar 1 khan Lalchhandama Ralte, Leader of Opposition & Chairman, Public Accounts Committee (PAC) leh Samar Kant Thakur (IAAS), Principal Accountant General (Mizoram) chu Leader of Opposition pisa, Assembly Annexe-ah an inkawm a, Sorkar department-te pawisa hmanralna uluk taka enzui a tul thu an sawi.
Principal AG Samar Kant Thakur chuan PAC tel lovin Mizoram AG office chuan hnathawh an thawk thei lo tih a sawi a, an hna pui ber pawh PAC hnathawh report pek a ni, a ti. Leader of Opposition Lalchhandama Ralte pawhin PAC chuan theihtawp chhuaha hna an thawh thu leh Tunhnaiah pawh Mizoram khaw chhak lam leh chhim lamah site visit neia an fehchhuah thu a sawi.
Principal Accountant General hian PAC Chairman Lalchhandama hnenah rawtna thlenin, Mizoram PAC chu Central PAC kalphung anga kal ve tur a duh thu leh a tul a nih chuan workshop/seminar buatsaih tura a inpeih reng thu a sawi a. Comptroller & Auditor General of India hnena PAC report chu thlen chu an hnathawh ber a nih thu a sawi bawk.
PAC hmalaknaah Judiciary a huam leh huam loh sawihonaah Principal AG Thakur chuan, High Court leh Supreme Court thlengin a huam tih a sawi a. Amaherawhchu, office establishment chauh an khawih thei thung tih a sawi.
Pu Thakur-a PAC pawimawhna sawiin, Sorkar department leh ministry-te excess expenditure chu PAC chauhin a regularize thei a, a process muang deuh mah se, PAC hnathawh chu a effective hle tih a sawi bawk.
Leader of Opposition leh Principal AG inkawmnaah hian AG Official bakah Mizoram Legislative Assembly Secretariat official – Pu Lalthangmawia, Addl. Secretary leh Pu John Lallawmsanga Sailo, Committee Officer-te an tel bawk a ni.
