Lawngtlai District, chhung Diltlang South paltlang, Lawngtlai atanga Parva panna kawng, Vaseikai leh Longpuighat inkar, Lawngtlai atanga Kilometres 125 vel a hla, Tuichawng lui a Lei dawhlai chu nimin tlai dar 5:30 vel khan a chim a,mipakhat in nunna a chan.
He Lei chim chhan hi chiang taka hriat nilo mahse, mita hmutute sawi dan chuan he Lei pawh nghehna tur a ban an phun chu a tliak a, hei vang hian chim ta anih an rinthu an sawi. Lei a chim lai hian hnathawktu mi 6 te chu a chimpui a, Lei hnuaia Tuichawnglui ah an tla a, Vanneihthlak takin an vai hian chhanchhuah an ni a, an zinga mi 2 chuan hliam na lutuk an neilo la, Vaseikai PHC ah kalpui niin, First Aid pek an nih hnuah an Camp lamah let pui leh an ni a, midang 4 erawh chu nizan la la khan Lawngtlai panpui an ni a, an zinga pakhat Hasar Ali kum 25 S/o Achar uddin , Assam chu a hliam tuar lovin Kawng lakah a boral a, midang 3 chu Lairam Christian Medical Centre & Hospital Lawngtlai ah enkawl an ni.
Lei dawh mek hi Ft 100 a thui tur ani a, Border Roads Organisation, hnuaiah V.I.J. Engineer & Consultant Pvt.Ltd. New Delhi chuan thawkin, Company a Civil Engineer Shyamal Som chuan hnathawhtur a ruahman za a 60 vel an zo tawh tih sawiin, Lei chim chu a theih ang anga senghawi anih hnu ah, a bul atanga tih that leh vek anih tur thu a sawi a, Company a Manager Tarun Kumar Sinha chu Lei chim hnuah biakpawh theih a nilo.
He Lei dawh hna thawk mektu Company a Civil Engineer leh Head Mistiri te chu Lawngtlai Police Station ah thuzawhfiah an ni a, Vaseikai Police ten thil thlendan an chhuizui nghal a, nunna chan ta, ruang chu vawiin khan Lawngtlai ah Postmortem anih hnuah an khua, Sonaikola, Assam panpui a ni.
