PHE Minister Prof Lalnilawma chuan vawiin chawhma dar 11 khan a office chamber-ah thuthar thehdarhtute kawmin, Mizoram sawrkar thuchhuak anga Mizoram Ground Water (Control and Regulation) Act, 2023&2024 hman tan tur chungchang leh he Dan thar hmanga Mizoram State Ground water Authority din anih chungchangte a sawi.
Pu Nilawma chuan leichhung tui la chhuaka hman tum reng rengte chuan mahni hman dan tur sawmdawnna te, lo neihna atan leh industry lam kaihhawih atana hmang turte chuan Mizoram State Groundwater Authority-te atangin form awmsa hmangin dilna thehluh a dil anih hnuah, phalna pek te chuahin lei verha lei chhung tui an hman theih tur thu a sawi.
Dan thara sorkar lama chhiah chawi tur te pawh sawi fiahin tui siak chhuaktuten tui litre 10,000 zelah chhiah cheng khat pek tur a ni. Irrigation atan nikhat 10Cum aia tamlo a nihin chhiah hi an awl anga, chhiah hmun li a then a hmun khat (1/4) chu State sorkar ah kalin, chhiah hmun li a then a hmun thum (3/4) chu Mizoram Ground Water Authority findsk August 2024 a kal tur thu sawiin, a tul ang VC/LC hnenah leichhung tui tih changtlun nana pek anih tur thu a sawi bawk.
An dan siam thar te hi chiang zawka hreduh tan online in www.phed.mizoram.gov.in ah en theihin an dah a ni.
PHE Minister chuan tun thla chhung hian a pangngaia tui pump theih an inbeisei a, a pangngaia sem theih hun tur erawh a la rei deuh a rin thu a sawi a.
PHE minister hian a pisa-a thuthar thehdarhtute a kawmnaah hian PHE dept. hotute chuan Cyclone Remal avanga Aizawl khawpui tana tui pump kawnga harsatna an tawh leh harsatna sukiang tura hma an lak dante an sawi a, “Theihtawp kan chhuah a, hma kan sawn ve zel,” an ti.
PHE dept. hotute chuan Cyclone Remal vanga khawl chhia chu Guwahati-ah an siam zo tawh tih sawiin, “Engineer-te’n a hmunah an zuk endik a, an duhthusam ang a nih loh avangin thiah darh lehin a bul atangin an siam that tir leh,” an ti a, tun thla ni 22 ah chuan Aizawl rawn phurh thlen theih beisei a nih thu an sawi.
Tun thla chhung chuan a pangngaia tui pump theih an inbeisei thu sawiin PHE dept. hotute chuan, “Kan beisei dan a ni a, kan pump thei kher a ngem tih erawh a hriat loh,” an ti.
PHE dept. hotute chuan a pangngaiin tui pump theih nimah se, a pangngaia tui sem nghal theih a nih dawn loh thu sawiin, “Tui sem a khaihlak rei tawh avangin a pangngaia sem leh theih hun chhung a la rei dawn,” an ti a, tui sem a khaihhlak hlekin a pangngaia tui sem leh hun chhung a rei thin thu an sawi.
PHE dept. hotute sawi danin, tui a pangngaia pump theih a nih atanga thla khat velah chuan a pangngaiin tui sem leh theih a nih a rinawm. Chutihrualin, khaw chinin a zir loh erawh chuan khawl tha tawh mah se, dan pangngaiin tui pump theih a ni dawn lo.
Aizawl khaw chhungah May, 2024 khan tui connection nei mi 79,322 an awm a Aizawl Water Supply Scheme Phase-III in 10.00 MLD a pump chhuah thin avangin consumer tam zawkte’n thla khatah tui vawi hnih an dawng thei a, vawi thum dawng hmante pawh an awm nia sawi a ni.
