Durtlang-Leitan leh Sihphir inkar kawng tihzauh leh siamthat hna thawk turin Mizoram PWD hnenah NOC pek a ni dawn a. Km 10.25 a thui he kawng laihzau leh siamthat hna thawk tur hian state PWD hnena NOC pe turin Project Pushpak CE hriattir a ni tih Border Roads Organisation hotuten vawiin khan MP (Lok Sabha) C Lalrosanga ziakin an hrilh a. He kawng zauh leh siamthat nan hian Ministry of Road Transport and Highways chuan cheng vaibelchhe 46.57 a lo ruahman tawh a ni.
Vawiin vek khan Lok Sabha ah Bairabi – Kolasib kawng 2 lane a siam nan cheng vaibelchhe 86.81 ruahman a ni tih ziaka tarlan a ni a. Tun sawrkar kum chhunga hmarchhak bial state hrang hranga cheng vaibelchhe 258 senga lamlian hrang hrang km 56 a thui siam tur project-te zingah, National Highway 154 a 2 lane a km 16 a thui Bairabi-Kolasib kawng siamna tur hi a tel a ni tih Road Transport and Highways Minister Nitin Gadkari-an ziakin a tarlang tih C. Lalrosanga chuan a sawi bawk.
