Mizoram Police chuan inthlanpui lo awm tur thlir chunga venhimna leh ruihhlo dona kawnga ngawrh lehzuala tan a lak mek laiin October 3, 2023 khan Lengpui Airport-ah Methamphetamine (Crystal Meth) tam tham tak man a ni. Meth hi Kg 10.4 a ni.
He ruihhlo (Meth) hi Myanmar atanga Delhi pana tawlh thlak mek niin, Lalremthangi (kum 38) thawmhnaw bawm (suitcase) atanga man a ni. Suitcase hi INDIGO Security X-Ray khawla scan a nih laiin rinhlelh a ni a, Mizoram Police ANTF (Anti-Narcotics Task Force) Unit ten ruihhlo hi belchiangin, man nghal a ni. A kengtunu pawh hi man nghal niin, ND&PS Act leh Foreigners Act hnuaiah Special Narcotics Police Station Case No.48/23 dt.03.10.2023 ziah luh ni in, thubuai siamsak nghal a ni.
Thu zawhfiahna atangin ruihhlo neitu hi Myanmar khua leh tui, Delhi-a Spa-a hnathawk a ni tih hriat a ni a. Tunhnaiah Myanmar hi tlawhin, ruihhlo tam tham tak nena Delhi lam a pan leh laia man a ni ta a ni. He ruihhlo man hi tunhnaia tum khata ruihhlo man hlawhtling leh lian tham ber anga ngaih a ni a. He mi hma thla khat kalta vel khan hetiang ruihhlo (Meth) tho hi Kg 3 chu ANTF Aizawl te hian an lo man tawh bawk a ni.
Heng ruihhlo lian tham tak man chungchanga hnu chhui zui ngai te hi ANTF Unit te hian ngawrh takin an chhui zui mek a ni. Mizoram Police chuan hetiang ruihhlo kaihhnawih thila inhnamhnawih lo turin mipuite a ngen a, ruihhlo awm lohna Mizoram siam tura theihtawpa min thawhpui turin mipuite, tlawmngaipawlte leh kohhrante kan sawm tak meuh meuh a ni, an ti.
