Vawiin March ni 14, 2022 (Thawhṭanni) hian Mizoram Pradesh Youth Congress Committee (MPYCC) chuan, March ni 10, 2022 tlaia Lengpui Airport Renovation lai a chim avangin, a mawhphurtute chhui chiang turin Lokayukta-ah FIR/Complaint an thehlut. Complaint hi Lokayukta Mizoram Chairperson hnenah thenluh a ni.
Lehkha thehluh thupui ber hi, ‘Lengpui Airport Renovation tur a tan Contract Award dan leh Lengpui Airport renovation chim chungchang chhui tura ngenna,” tih a ni a. FIR thehluhah hian point pahnih ziak a ni.
MPYCC President Dr. Lalmalsawma chuan Lokayukta lama an FIR thehluh chungchangah, “Vanduai thlak takin March 10, 2022 Zirtawpni tlai dar 4:30 vel khan Airport Renovation tur a hna an thawh mek chu slab an chhun laiin a chim a, a beam leh ban te tliak rem rumin a chhe hneh hle a ni. Vanneihthlakin mihring nunna chan a awm lo hlauh a, a hmun ngeiah pawl hrang hrang ten an tlawh hnu-ah contractor-in a hna a thawh dan a (sub-standard) ṭha tawk lo tih chu a hmawrbawkna a ni,” a ti a.
“Lengpui Airport renovation hna thawk tura Contractor-te thlan an nih danah sawi neuh neuh a tam hle mai a. Budget-ah a pawisa tur sanction awm hma hauh leh Work Order pawh a chhuah hma in thla engngemaw zat contractor in hna an thawk lawk tawh tih te sawi zel,” tiin Congress Ṭhalai President chuan a sawi.
Chuvangin Works Contract an award danah ten thil felhlel a tamin, corruption thuk takin a in rawlh ngei ni a rin theih a ni a. Loy Akuyta hian min chhui dak turin kan ngen, Dr. Lalmalsawma’n a ti.
Lengpui Airport hi a lun chho dawn chauh a, mihring tam takin an hman tur a ni a. Tunah hna an thawh tawh te pawh a quality min chhui sak a, an hna thawh dan leh hmanrua an hman dan te min chhui chian sak turin kan ngen a ni, a ti a.
“Mihring nunna a hlu a, khuti ringawt chuan nakin zel ah mihring nunna a tan hlauhawm anih theih avangin uluk tak a chhui a ngai niin kan hria a, min chhui sak turin kan ngen,” Dr. Lalmalsawma chuan a ti bawk.
Aviation hrim hrimah hian chhui tur a tam niin a lang a, Congress Thalaiin Aviation-a sum chingpen chungchangah Loy Ayukta-ah complaint a thehluh pawh Lok Ayukta chuan CBI ko lut turin a ti tawh a. Mahse kan hrawn lai mek sorkar hian a a dang char char hrih a hriat a ni. Khami case pawh chhui putling ngei turin Lok Ayukta-in CBI koh luh a rawt ngei angin kan sorkar hian CBI ko lut ngei turin kan phut nawn.
Lok Ayukta Chairperson Pu C. Lalsawta chuan complaint lo dawngin, ‘man power’ a neih tlem zia leh hna thawh tak tak a harsat zia a lo sawi a. Hna an thawh theih tak tak nana tun aia thuam chak an ngaih zia a lo sawi bawk. Case dangah pawh CBI koh luh tur an tih ngei pawh sorkarin a koh luh duh miau loh avanga harsatna an tawh thu a sawi bawk.
