UD & PA Department-in LGBTQI Shelter, Aizawl Sakawrtuichhun hmuna sak tura tender a chhuah tawh chu vawiin hian cancel a ni leh ta a. He Shelter sakna tur cancel a ni leh ta hi MNF chuan lawmawm an tih thu sawiin, “Cancel a nih theihna tura hmalatu Chief Minister, Pu Zoramthanga leh UD&PA Minister, Dy. CM Pu Tawnluia chungah lawmthu kan sawi tak meuh a ni,” an ti.
MNF chuan, “MNF Party hi sakhaw tih bik nei a ni a, ‘Pathian leh kan Ram tan’ tih thupuia neitu a ni a. Kristian-te Pathian hi MNF-in PATHIAN a tih chu a ni a. Pathian duh loh zawnga ram leh hnam chimral tumna awm thei leh Kristiante rinna pawlhdal thei ang zawnga chetna chu MNF chuan a do zel dawn a ni,” an ti bawk.
