District Transport Office Aizawl hnuaia Enforcement Staff te chuan kar thum kalta chhung, April 29 atanga May 17 khan lirthei 1477 an endik atangin dan bawhchhia 224 an man a, hremna atana sum chawi tir tlingkhawm chu Rs. 11,10,000 a ni.
Lirthei dan bawhchhe zinga 35 chu a hmuna pawisa chawi tur neih loh vangin an document lak sak a ni a. Lirthei hremna atana sum chawitir thin hi sawrkar sum bawmah chhunluh vek thin a ni.
Dan bawhchhia lirthei hi maxi cab an tam ber a. Commercial vehicle ni loah chuan LMV man an tam ber. Bungraw phur chi lirthei lian chi (heavy vehicle) leh lirthei te chi (light goods vehicle) zingah dan bawhchhia an tam bawk.
Transport department hotute chuan lirthei hralhtu in hming thlak (transfer of ownership) ngaipawimawh turin an chah a. Lirthei number inang chungchangah hma lak mek zel a ni, tiin, mahni number ang bel hriate chuan DTO-a report turin lirthei neitute an chah.
Passenger vehicle nei ten rate dik taka fare la turin an hriattir a, rate chungchanga lungawilohna nei tan DTO (RA) office ah ziakin complain thehluh theih reng a ni tih an sawi bawk.
