Pathianni tuka Lunglei district-a Thingfal khaw bula pickup chesualah mi 4 an thi.
Lawngtlai atanga thudawn danin, he lirthei chesual a thite hi – Lalbahadur (25), Lalremtluanga (21) Eliza (11) leh Johna (21), Lawngtlai district Sabualtlang khua vek an ni a. An chetsual hun hi zing lam dar 3:30 vel ni a hriat a ni. Chetsualna hmun hi kham sang tak a ni a, lirthei hi meter 250 chuang kawng thlangah a lum a. A hmun tak hi Thingfal khaw dai, Thingfal leh Thingkah khaw inkarah a ni a. Thingfal khawtlang bakah Thingkah leh Lawngtlai atangin mi tlawmngai tam takin chetsualna hmun hi an pankhawm a ni.
Lirthei a chuangte hi Delhi atanga Krismas hmang tura lo haw Lalbahadur leh amah hmuaktute an ni a. Aizawl atanga an khua Sabualtlang pan an ni.
Ruang hi lakchhuah kim nghal an ni a, an lak chhuah hnuhnun ber naupang kum 11 mi Eliza ruang, kham awih taka tang hi nimin tlai dar 5:30 vel khan an la chhuak a ni. Ruangte hi Thingfal Community Hall-ah lak vek phawt a, thlahna hun siam a ni.
