LMC atan BJP-in Lungleiah campaign kick-off

Vawiin atang khan BJP Mizoram chuan Lunglei Municipal Council inthlan lo awm tur thlir chungin Election Campaign Kick-Off, Lunglei Venglai ah neiin, Dr. Aichhunga, BJP Lunglei District President chuan a kaihruai a, Dr. BD Chakma MLA, State Vice President, Nirupam Chakma, National Council Member ten thusawina hun an neiin, Vanlalhmuaka State President in thusawina hun a nei bawk.
Dr. BD Chakma, MLA chuan, “Lunglei hi Mizoram khawpui 2-na ni mahse hmasawnna hmel hmuh tur tam tak a la nei a, kawngpui chhe lutuk han hmuh te hi a lungchhiatthlâk takzet a ni. Lunglei Municipal Council-ah BJP thuneihna kan pe a nih chuan, tuna Lunglei khuain harsatna tam tak kan tawhte hi sutkian ani ngei dawn a ni. Mi thenkhatin BJP in thuneihna an chan chuan bawngsa ei te an khap anga, Biakin te khar a ni anga, Kristiante nekchep kan nih hlau thawng tam tak kan awm thin, nimahsela Mizoramah BJP sorkar-na kan pe anih chuan heng Party the khat ten a, min chirh thehna, kan lo hlauhthawn lawk te hi a thleng ngai dawn lo a, alo thleng a nih chuan, MLA ka nihna atangin ka bang ang tih ka hrilh duh che u a ni” a ti.
Nirupam Chakma chuan, ” Kawlphetha tha zawk Mizoramin kan mamawh êm êm a, hetiang taka ‘Power Supply’ ah kan hnuaihnung lutuk hi a pawi hle a, Central Sorkar in project an rawn hawn pawh State a Sorkar na chelh te’n an thawk tha duh lo hi a pawi a, kan ram hmasawnna tur chu rahbeh a ni thin a ni. Chuvangin hmasawnna dik tak mipui tana rawngbawltu dik tak BJP te hi thuneihna kan pek a hun tawh hle a ni” a ti.
Vanlalhmuaka, State President chuan thusawiin, “Vawiinah Lunglei khawpui laili tak a BJP Mizoram te’n Public Meeting kan buatsaih chhan chu Lunglei khawpui hian kan Prime Minister Pu Narendra Modi sorkar chak tak, mitinin an mamawh ang hmasawnna an chan theihna atana ruahmanna a siam, kan thenawm state sorkar zawng zawngin an thal mek ‘Development’ chu in lo chan ve theihna atan kan hma lawka Lunglei Municipal Council Election-2022 lo awm tur hi hmang tangkai turin, chhim bial hmasawnna chu i vote hlu tak hmanga lo vote chhuak turin kan sawm che u a ni”, a ti bawk.