MNF Adviser Dr.R.Lalthangliana chuan Lunglei Municipal Council inthlan lo awm tur atan ward hrang hrang la fan chhunzawmin, mipui hmaah thusawina hun a nei zel a. Vawiin March ni 25, 2023 (Inrinini) hian Serkawn, Zotlang, Lunglawn, Theiriat, Chanmari, College veng leh Ramthar-ahte Street campaign-naah thu a sawi bawk. Pu Zothankima Renthlei, Congress V/C Vice President Zotlang, Pu C. Lalbiakfela leh Pi Zosangzuali-te chhung Zotlang congress atangin MNF-ah a lawmlut nghal a, lawmluhte aiawhin Pu Zothankima Renthlei Congress V/C president atanga lawmluh chuan thu a sawi. Lunglawnah hian Pu Robert Lalnunmawia congress-te chhungkua voter-5 a lawmlut leh nghal bawk.
Dr.R.Lalthangliana Health Minister chuan party thenkhatin MNF chu Lunglei lam ngaihthah leh engmah thawk lo anga social media-a vawrh thin chu thil thalo tak a ni tih chhangletin, MNF sorkar thar chuan Mizorama integrated laboratory lian ber chu Lunglei-ah an dah tawh thu te, puitling leh naupang ICU la awm ngai lo Civil Hospital Lunglei-ah ICU 28 an hawn fel tawh thu te, tun hnaiah Mizorama Trauma Facility centre hmasa ber neihna hmun chu Lunglei anih thu sawiin, Chief Medical Officer office thar an hawn tawh thu a sawi. Lunglei market building chhe tawh mipui tana hlauhawm tawh lutuk chu changkang taka sak that nan cheng vaibelchhe 14.43 zet senna Bazar building sak tur lung an phum tawh thute a tarlang bawk. Lunglei By-pass road atan cheng vbc tam tak ruahmanna kan siam thar a. NHIDCL hnenah tender pek niin, nimin lawkah MoRTH chuan DPR siam tur tender a chhuah thu a sawi bawk. Reiloteah Lungleiah Geology & Mining Regional office thar, post 15 keng tel tur an hawn thuai tur chu a sawi bawk.
Assam Rifles-te pawh a order mai ni lo, an bungbel nen Zokhawsang lamah Pu Zoramthanga kaihhruai sorkar chuan a suan phei ta chur chur mai chu lawmawm a tih thu a sawi a. Pathianin MNF chu a hruai a, Pathian khawngaihna a zarah state-ah sorkarna kan siam zawm leh ang a, LMC-a kan thlan tharte nen tha takin kan thawk ho ang. Congress-in tuna MLA 5 an neihna hmun hi Mizoram laili bial lo deuh vek a ni a, heng bialahte hian MNF-in MLA kan neih belh ang. ZPM-in social media-ah thupuar pawleng, a tak tak hmuh tur awm si lo nasa takin an vawrhdarh chiam chiam a, a takah an kawrawng hle a ni. Kumin kum tawp inthlanpuiah hian Pathianin MNF bawk a sorkar tir leh ngei ngei dawn a, chutiang chu tuna Mizoram kalphung a la ni rih tlat, a ti.
Municipal tul ti lo ho hian Lungleiah LMC a awm tul ti lo angin an awm a, municipal nasa takin an sawisel a, flag eng nen an tlan phe ve dawr dawr a, nasa takin an bei ve leh si a. In hnuhdawh hun pel tawh mahse; LMC awm thalo titute hian candidate an inhnuk dawk ngam mai lo em ni tih chu ka zawhna a ni. Keini chuan a hlutna leh thatna kan hria a, kan LMC sorkar thar siam hmangin Lunglei khawpui hi kan chei dawn a ni, Dr.R.Lalthangliana chuan a ti bawk.
Congress sorkarah khan Pukpui rama Engineering college pawh sorkar hmasain cheng vaibelchhe tam tak sengin a building ringawt a sak, thawktu tur ruahmanna a siam si loh, a building a sak ringawtah pawh harsatna kan tawk a. Electric hrui an thlunzawm lo a, kawng mumal a awm hek lo, a uihawm kan ti a, luah theih tur chuan cheng vbc 10 vel tal ruahmanna siam a ngaih tur thu a sawi a, politics-a inbeihna tura hman chi a nih loh thu a sawi bawk.
