Vawiin March 27, 2023 hian Lunglei Municipal Council inthlan lo awm tura Congress Party Campaign Closing function, Congress Bhavan, Lungleiah neih a ni a. Rev. KV Thanga, BCM President-in hunserh a hmang.
He huna thu sawitu Lalsawta, President, MPCC chuan, “Congress Party candidate te lo vote theuh turin Lunglei mipuite ka ngen che u a ni. Municipal Council a awm dawn avang leh, NREGS a awm tawh dawn loh avanga mangang taka awm mi harsa zawkte kha lo mangang suh u. LMC a Congress kan sorkar a, MLA Election a kan sorkar zui leh a nih ngat chuan khawpuia mi rethei zawkte tan Urban Employment Guarantee Scheme kan siam dawn. Kam sawi mai mai lo, a takin kan ti hlawhtling dawn. Hetia kan sawi avang hian MNF Party chuan khawpuia mi retheite inhlawhna tur budget-ah kan dah vek tawh an lo ti ve ringawt a ni awm a. Mahse, ngun takin Budget bu kan zirchiang a, an thusawi hi thu dik lo a ni, Budget-ah an dah reng reng lo. Mipui bum tumin dawt an sawi a ni. Politics a nih avangin dawt sawi mai mai tur a ni lo, Mizoram mipuite hi bum bum tlak kan ni lo,” a ti.
Lal Thanzara, Vice President, MPCC pawhin thu sawiin, “Congress Party hi a rintlak a, kan ti ang tih chu ti mai thin Party kan ni. Tuna Lunglei tana kan ti ang kan tih pawh hi kan sorkar chuan kan ti mai dawn a ni. Lunglei mamawh em em RT-PCR Pu Zodintluanga’n a pe a, MNF sorkarin an commission duh lo. Hetiang khawpa Lunglei hmangaihtu MNF leh an Candidate te hi Lunglei mipuiten an vote ka ring lo,” a ti bawk.
Vawiin March 27, 2023 a Lunglei District Congress Committee huaihawta LMC Election Campaign kharna inkhawma kalkhawmte chuan hetiang hian Resolution an siam :
Lunglei Municipal Council inthlan kan hmachhawn mekah, kan ram leh hnam chhiatna bul ni thei a nih avanga Mizoram a lo thleng tura kan duh loh em em mihring in leina ni ngeia ngaih theih, pawisa leh Work Order hmanga inthlem chhuah thawm hriat tur a tam ta hle mai a.
Hei hi kan hnam nun leh Politics chhiat hlen vek theihna, kan Kristianna pawh nasa taka nghawng thei a nih avangin Lunglei District Congress Committee chuan na takin kan dem a. LMC inthlan vuak vetah hetiang thil tha lo, mihring inleina laka fihlim turin LMC huamchhunga mipuite kan ngen a ni.
