Vawiin khan MPYCC chuan an President Pu Laltawnliana hovin Lok Ayukta Chairperson Pu C. Lalsawta hnenah MPYCC ten FIR an thehlut a. FIR thehlut tu hi C. Vanlalhruaia MPYCC General Secretary niin, FIR ah chuan a hnuai a mi ang hian an tarlang.
Mizoram Pradesh Youth Congress Committee (MPYCC) hmingin chibai ka buk a che.
Tun hnai a Mizoram Legislative Assembly Speaker Pu Lalrinliana Sailo Maryland, USA zin in Maryland-a Zofa awm te nena an inkawm khawm naah, Deputy Chief Minister Pu Tawnluia Department hnuai a, dik lo tak a Cheng Nuai 100 chuang hnathawh awm lova ziah ral a awm thu Chief Minister Pu Zoramthanga leh Deputy Chief Minister Pu Tawnluia te thutdun lai ngei-a a hrilh thu a sawi na video Youtube lama an dah chu kalo hmu a.
Youtube Video a Speaker Pu Lalrinliana Sailo thusawi atanga a lan danah chuan, Mizoram Legislative Assembly Speaker Pu Lalrinliana Sailo hian, kumin January ni 30, 2023 khan MNF Minister leh MLA zawng zawng te an in hmuhkhawm naah, Chief Minister Pu Zoramthanga leh Deputy Chief Minister Pu Tawnluia te thutdun laiin, Speaker Pu Lalrinliana Sailo hian Deputy Chief Minister Pu Tawnluia Department chan hnuaiah, Cheng Nuai 100 chuang a hman na awm lo a, Department hnuaia thawk la naupang tak pakhat in a kut ngei a, JE pakhat awm laia hrehawm ti taka a ziah ral thu a hrilh tih Speaker Pu Lalrinliana sailo hian a sawi a. He thil thleng hi tha a tih loh em avangin an department chan pawh en uluk tawh turin a hrilh hial niin a sawi bawk a ni.
Mizoram Legislative Assembly Speaker meuh in Deputy Chief Minister Pu Tawnluia department chan hnuaia dik lo tak a, a hman na awm lo a cheng nuai 100 chuang ziahral a awm thu a sawi hi, keini MPYCC chuan kan ngai thutak hle a. He thil serious tak Mizoram Sorkar Sum Cheng Nuai 100 chuang lai, a hman na awm lova ziah ral chung chang hi, min chhuichhuah sak tur leh a tul anga hma min laksak a, thil ti dik lotu chungah dan anga action min laksak ngei turin kan ngen a che.
Mizoram Legislative Assembly Speaker Pu Lalrinliana Sailo-in Maryland, USA-a a thusawi lai video pawh pendrive hmangin kan rawn thil tel nghal bawk e.
