Parliament In tharah nimin khan Women’s Reservation Bill, 2023 putluh a ni a. Union Minister of State for Parliamentary Affairs leh Law Minister ni bawk Arjun Ram Meghwal putluh he bill hi ram rorelna In, Assembly leh Lok Sabha-a seat zaa 33% Hmeichhiate tana hauhna tura bill hi putluh a nih theih nan nizan hmasa khan Prime Minister hova Union Cabinet ṭhukhawmin putluh an lo remti a ni.
Constitution 128th Amendment Bill hi putluh a nih tur thu nimin chawhnu khan Parliament In luah thar hnu lawka Lok Sabha ṭhutkhawmnaah Prime Minister chuan puangin, putluh a nih theih nana vote lak a ni a, chutah chuan MP (Lok Sabha) C. Lalrosanga pawhin bill putluh dilna hi ṭha tiin a thlawp a, bill hi tun ṭum Parliament session chhung hian sawiho hman rin a ni.
He bill hi rampum huap dan a nih hunah chuan Mizorama ram rorelna In Legislative Assembly-ah te pawh hmeichhiate dinhmun siamṭhat leh tihchak nan a la pawimawh hlê dawn a ni tih C. Lalrosanga chuan sawiin, bill hi pass a nih a rampum huap Dana pawm a nih hunah chuan kum 15 hman phawt tur a ni a. Bial ṭhenfel, delimitation hnuah kum 2029 aṭanga hman theih tur ni a hriat a ni a ti.
