BJP Mizoram chuan vawiin 4th April, 2024 (Thursday) hian Lok Sabha MP Election Campaign Launching Programme chu BJP Mizoram State Conference Hall, Mipui Run, Upper Republic ah neiin, Dr. K. Beichhua MLA, Election Management Committee Chairman-in inkhawm a kaihruai a. Devesh Kumar, BJP Mizoram State Election Incharge-in Campaign hawnna hun a nei a, M Kikon, State Prabhari-in thusawina hun a nei bawk a, JB Rualchhinga, State Vice President-in Vanlalhmuaka, BJP Official Candidate chanchin sawina a neih hnuah Vanlalhmuaka State President, BJP Mizoram MP Election Official Candidate-in thusawina hun a nei bawk.
Vanlalhmuaka, BJP Lok Sabha MP Official Candidate chuan, “Mizorama MP Candidate hrang hrangte kan thlirin kei hi a ṭha ber ka ni lova, nimahsela Central ah hian BJP an Sorkar leh ngei dawn avangin, BJP Official candidate ka nih avang erawh chuan Candidate ang te ai chuan ka awmna in a zir avang zawkin Mizoram tan chuan ka ṭha ber dawn thung a ni,” a ti.
Pu Hmuaka chuan, “MP Election lo awm tur hi Mizoram tan a pawimawh hle a, Bible-a Josefa dinhmun kan hmuh ang khan, Aigupta rama Josefa a awm a, Kanan rama a unaute tana eitur lo pe a, Farawa dawhkan ah ngei a unaute alo hrai puar ang khan keipawh hi Mizoram Sorkar a kan CM leh Minister ten Central-a thil an dil hun ah an mahni pui tur leh tlangnel taka Modi dawhkan lo kilpui turin Mizoram mipui te zarah MP a thlantlin ka nih chuan chu chu ka hna tur ani dawn a ni,” a ti.
Pu Hmuaka chuan sawi chhunzawmin, “Party ṭhenkhat ina, India ram Hindu rama siam tum anga an sawi ṭhin pawh, India ram hi Hindu ram sa a ni zawk tih hi History ah kan hmu a, Ram thim a nih vangin Tirhkoh Thoma ngei pawhin chanchin ṭha a rawn thihchilh zawk a ni. Chuvangin Kristiante hian Ram thim rawngbawlna tur kan ngah hle a, chuvangin Political Mit dawivaih hmanga BJP a nilo zawnga bei ṭhin tute’n min hmangaih vang a nilo tih hriain, chanchinṭha kan hrilna tur atana kan intodelh theihna turin BJP MP nei turin Mizoram mipui te pawh inbuatsaih ila, Mizorama MP inthlan pawimawh ber kan hmachawn mek a ni tih hria a, Mizoram mipui te’n, BJP MP nilova, Mizoram MP ka nihna turin khawngaih taka min vote ṭheuh turin in khawngaih Vote ka rawn dil che u a ni,” a ti bawk.
Inkhawmah hian Ex- Mizo National Army aṭangin BJP zawm thar mi panga lawmluh an ni bawk.
