Congress Party Lok Sabha MP Candidate Lalbiakzama chuan tukin khan Siaha Bazar-a Public Meeting neiin, “Lok Sabha inthlan lo awm tur hi MNF leh ZPM te nena inbeihna a ni lo. Kristian te nekchep a tih boral tumtu BJP leh Sakhaw zalenna humhalhtu Congress Party te Indona a ni,” a ti.
“BJP chet dan hi ngun taka kan chhut chuan a rawva tulh tulh a, pawisak an nei lo tulh tulh a. Nikum chhung ringawt pawhin India ram hmun hrang hrangah Kristiante tihduhdahna vawi 648 a thleng tawh a ni. Manipur-ah Kristian Biak In tam tak suasam a ni a. Mi tam takin nunna an chan laiin Prime Minister chuan vawikhatmah Manipur ala tlawh lova. Hei hian Kristiante min tham loh zia a tarlang chiang hle a.
“India ram lairil zawka Kristian Missionary te chu enthlak reng an ni a. Kan Lalpa Chanchin Ṭha hril hi BJP Sorkar hnuaiah a harsa hle tawh a ni. Assam a BJP sorkar phei chuan tihdam rawngbawl hna thawh phal lovin Assembly House ah dan an passed ta rup mai a ni. Nasa zawkin Kristian tana harsatna siam turin ke an pen zel a ni. India danpui bung 25-naah chuan sakhaw tinten zalen taka mission hna an thawh hi kan chanvo tur a nih laiin BJP sorkar chuan he dan hi tidanglam chuang si lovin Kristiante tan harsatna min siam chho char char a.
“India ram Institution hrang hranga Principal leh Dean ni turin thiamna mai bakah RSS chhuak nih a ngai tawh a. RSS te chuan India hi Hindu mite chenna tur a anih thu inzirtirin hnam tlem zawk leh sakhaw tlem zawkte chungah hleihluak takin chet an thawh zel a. Rawva tak taka Kristiante sawisa a, rawktute lakah FIR chu thehlut ve mahse Jail an tang thei lova. A lehlingin Kristianten min bum tiin pawisa te pawh an chawi tir zawk a ni. Hei vang hian India rama roreltu tur kan hma lawkah kan thlang dawn a. Mizo Kristiante hian ngaihtuahna fim tak hmangin he inthlanna hi kan hmachhawn a ṭul a ni,” a ti bawk.
He hunah hian MPCC President Lal Thanzara pawhin thu sawi in, “Congress party candidate a nih vang ngawtin min vote turin kan ngen lo che u. Central ah BJP a sorkar leh a nih chuan kan sakhaw lungphum a nghing zual dawn a. Kan missionary te an chep sauh dawn a. Krista ringtu kan nih avangin chanchinṭha hrilh khap chho mek BJP te bula ṭhu tur MNF leh an lamṭang nia rinhlelh te ZPM vote lo turin ka ngen cheu a ni.
“BJP ten India ramah pawisak nei lovin ro an rel mek a. Delhi CM Arvind Kejriwal chu manin Congress Party pawisa an hren sak a. Hei hian BJP ni lo te a ti pum khat a. Regional Party hrang hrangten Congress kaihhruai INDIA Blog chu an rawn pan khawm mek zel a. Sakhaw zalenna chawinung turin Central ah pawh Congress leh a thawhpuite dinhmun a ṭha chho sawt hle a. Kan hmasawnna hi a lawmawm tak zet a ni,” a ti.
MPCC General Secretary Joseph Lalhimpuia pawhin thu sawiin, “Siaha chu Missionary te awmna, Pu A. Lorrain-a ten theihtawp chhuaha an rawngbawlna a nih avangin Mara fate zingah lehkha thiam tam tak an chhuak tawh a. MPSC hna lakah Mara fate an tel loh ṭum a awm mang lo. Mara fate rilru a nghet ṭha a. BJP ten thlemna chi hrang hrang an tawktarh che u a. Mahse, vawiin ni thlengin an thil tiam an la tihhlawhtling lo. Missionary tu leh faten an chenchilh che u a. Nikum lawka Pi Violet-i a boral khan Mara mipuite kan sun pui che u a. Siaha hi Evangelical Churh of Maraland khawpui a ni a. ECM hmunpuiah Kristiante tiduhdahtu BJP leh a lamṭangten hnehna an chan lohna turin khawngaih takin kan Candidate Pu Lalbiakzama hi min lo vote pui turin ka swm che u a ni,” a ti bawk.
