Luangmual nula ten Jimmy Club nulate 4-1 in an sawp

chu Rithegaa G (Luangmual) a ni.

–

A zawna vawi thum champion thei turin Luangmualin hmabak an hlen zel a, thawhtanni zan EverHome Pro Volleyball hmeichhe league inkhel hnuhnung berah set li set khatin an elpui Jimmy Club an hneh.

LPS Arena, Falkland-ah Luangmualin tha takin final an urlawk a, Rithegaa G chuan hnehna kawngah team hruaiin Remlalnghaki’n hlawk takin a khel bawk a, beisei aia awlsam 15-8, 15-5, 15-10, 15-9, 11-15-in an chak.

Hmeichhe team pathum inelin Luangmual leh Jimmy Club-in Bungkawn an hneh ve ve avangin final an lut sa tawh a. Inhnehtawk viau tura ngaih an nih laiin set lina thlengin Luangmual an chungnung a, Rithegaa chuan point 22 hmuin tum ruk a tisual a, Kuriz Player of the Match-a thlan a ni.

Remremi’n point khat chiah hlohin vawi sarih a vaw tla a, Luangmual Mizo player zingah mi mala thawh hlawk ber a nih rualin team inpumkhat tha takin an khel thei a; lehlamin vuak tlak an harsat bakah point an hloh hnem a, rei tak chhung an talbuai.

Team thar Jimmy Club tan Jashanpreet Kaur chuan point 18 hmu mah se 11 a hloh a, Bungkawn an hneh tum angin a che thei lo. Mizo player-ten chet an harsat leh zual a, Lalmuanpuii leh Lalrammawii’n point li an hmuh zat chiah an hloh ve ve a, chakpui thamin tute mah an inlan lo.

Zirtawpni zan final-ah an intawng zui leh dawn a, 2023 leh 2024 champion Luangmual tan inbuatsaihna tha tak ni nghalin inrintawkna sang tak nen an khelh theih dawn a; Kanan Veng team-in insiam that nan ni li chhung inpuahchahna hun an nei.

Set khatna atangin team thar lakah Luangmual an kal fal a, Rithegaa chuan a ball hmuh vaw tla zelin B Tlangmawii Varte chuan a service atangin point thum a thawk chhuak zawn bawk a, 9-4-in an sang.

Jimmy Club rinrawl Punjabi tleirawlin a tihsual thin bakah a vuak an laksak fo avangin team a pawt hniam. A vuak kai loh hnu lawkah point hloh lehin 14-8-in Luangmual an sang a, Tamil Nanu atanga an lak luh Rithegaa chuan set an lakna point a hmu ve thung a ni.

Luangmualin inkhel thunun zui zelin Remremi, Tlangmawii leh captain Lalramliani’n point an hmuh zawn hnuah 10-3-in set hnihnaah hma an hruai leh. Remremi’n a vuak tlak leh rualin point hnih hmuh belha tlang thei turin an sang a, an tihsual vangin Jimmy Club-in point hnih an hloh zawn a, point nga chiah an hmu ve hman a ni.

Set thumnaah 3-3 a nih laiin Rithegaa chuan hlap tlain Luangmualin point nga

an hmu zawn zui a, lehlam hnaih phak lohin hma lam an pan zel a, point ngaa inthlauin an tlang.

Set linaah champion laiin derthawng hman lovin hma an hruai tluan leh a, Jashanpreet chuan net chung atanga Rithegaa-i vuak a dan tlak rualin 12-9-in Jimmy Club-in hnaih deuh mah se, point an hmu belh zui lo.

Set nganaah erawh Luangmual insawrbingna a tla hniam a, Janshanpreet chuan Rithegaa dang nghalin point an hloh zawn chho tel bawk. Janshanpreet chuan vaw tla zawnin Muani leh Mamawii’n point an hmuh ve leh hnuah 11-3-in Jimmy Club an sang ve thung.

An inthlauh viau laiin champion laiin point nga hmu zawnin an inkar a zim leh hman a, Mamawii’n vaw tlain lehlam kal tluang a tihtawp hnuah 13-10-in Kanan Veng team-in hma an hruai. An mamawh point hnih hmu zawnin Maria Lalremsangi’n a vuak tlak rualin beisei nei zui thei turin set khat an sual chhuak a ni.

STATS

LUANGMUAL

Rithegaa G : point hmuh 22, point hloh 6

Remlalnghaki : point hmuh 7, point hloh 1

Lalramliani : point hmuh 4, point hloh 2

Lalbiakngheti : point hmuh 3, point hloh 2

B Tlangmawii Varte : point hmuh 5, point hloh 6

JIMMY KANAN

Jashanpreet Kaur : point hmuh 18, point hloh 11

Lalmuanpuii : point hmuh 4, point hloh 4

Lalrammawii : point hmuh 4, point hloh 4

Lalhriatpuii : point hmuh 2, point hloh 3

R Laltleipuii : point hmuh 1, point hloh 2

R Malsawmtluangi : point hmuh 0, point hloh 1

FIXTURE

SEMIFINAL (MIPA)

MAY 20, 2025 (THAWHLEHNI) – 8:00 PM

Tuichangral v Thutak Nunpuitu Team

MAY 21, 2025 (NILAINI) – 8:00 PM

Khawbel v Anastasia Electric Veng

FINAL (HMEICHHIA)

MAY 23, 2025 (ZIRTAWPNI) – 8:00 PM

Luangmual v Jimmy Club Kanan