Ather Pro Volleyball League 2024
@ LPS Arena, Falkland
RESULT : FINAL
May 30, 2024 (Ningani) zan
Luangmual def Diakkawn (hmeichhia)
= 25-19, 22-25, 25-19, 18-25, 15-12 (3-2)
Kuriz Player of the Match
= Lalramliani (Luangmual)
Nivia Fan of the Night
= Eddie Sailo (Luangmual
REPORT
Luangmualin final hautakah set thum set hniha Diakkawn hnehin hmeichhe title humhim hmasa ber an ni a, ningani zan khan Ather Pro Volleyball League-ah an champion.
LPS Arena, Falkland-ah set hnih set khata sang zawk an nih hnuah Luangmual an tla hniam a, set hnuhnung berah kir lehin 25-19, 22-25, 25-19, 18-25, 15-12-in an chak.
May 30 khan league-ah set thum set hnih thovin Diakkawn lakah Luangmual an chak tawh a, hemi tuma khelh tha bera thlan Lalramliani’n Kuriz Player of the Match lawmman dawng lehin, point 22 hmuin tum sarih a tisual.
2023 khan Pro Volleyball-a an tel vawi khatnaah chungnung takin Luangmual an champion nghal a, state dang player Nipa Barad-i hovin an khelh zawng zawngah an chak vek. Kuminah Mizo hlangin chona khirh an su tlang a, hmeichhe zinga champion zawn hmasa ber leh vawi hnih champion thei hmasa ber an ni.
League-ah Serkawn hneh lovin an tlawm a, semifinal-ah Bungkawn hneh nan set nga an mamawh bawk. Luangmual tan season liam ta aiin a harsa a, KT Enterprise Best Spiker Rami bakah Lalbiakngheti’n final-ah tum 16 vaw tlain point li a hloh a, Lalhriatpuii’n point 10 a hmuh chanve a tisual.
Luangmual sulhnu chhuiin Pro Volleyball-a an tel hmasak berah Diakkawnin champion nghal an tum ve thung. Mahse, a tawpah tluk an tumten dangin uiawm takin an tlawm a, Aizawl pawn atanga champion hmasa ber nih an tumna an tihlawhtling zo lo.
Kolasib team tan Lalmuanpuii’n vawi 18 vaw tlain tum sarih a tisual a, Mizo zinga international player awm chhun Vardingliani’n a hun hnuhnungah point 16 hmuinn 12 a hloh ve thung a, R Malsawmtluangi’n tum 10 hlap tlain point li a paih.
Pro Division-a season khat an hmannaah Luangmual nen vawi thum intawngin Diakkawn an chak lo vek a; nikum December 1 khan MVA Cup final-ah set thum faiin an tlawm tawh a, chuti chungin tournament vawi hnih an khelhah final an lut ve ve.
An vanglaia Mizo player tha ber ve vea ngaih leh Pro Volleyball-a champion tawh Muani leh Dingi’n Diakkawn team-ah hmun pawimawh an luah laiin, vanglai hmang mek Rami, Biaki leh Hriati hovin Luangmualin nung takin bul an tan a, set khatnaah 15-15 atangin an kalsan.
Veikhawr Hriati’n a vuak tlak rualin point nga an hmu zawn a, Diakkawnin 21-19-in hnaih leh hman mah se point li hmu zawn lehin Luangmual senior player B Tlangmawii Varte chuan set an lakna point a thawk chhuak a ni.
Set hnihna an tan rualin Aizawl pawn team an insiam rem a, Luangmual talbuai ve thungin 17-6-in an um pha lo. Setter F Lallianchhungi leh FVL Hmuchhuaki thlak tawnin Rami’n a vuak tlak hnuah 20-18-in an hnaih leh hman.
A hnuah Diakkawnin point hniha an inthlauhna humhimin 24-22-a sang zawk an nih laiin Hmingthazuali’n a vua a, dan tumtu Biaki’n net khawihin set lakna point an hmu. Mahse, an nghet rei bik lo a, set a zawh rualin team boruak a inthlak ve leh nghal.
Set thumnaah 9-9 a nih laiin Biaki’n a hlap tla a, Luangmualin point li hmu zawnin an kalsan. A tira lut zinga tel lo Lalnunpuii’n tum hnih vaw tla zawnin Aizawl team-in dinhmun tha an luah zel a, 24-16-in an sang. Diakkawnin point thum hmu zawn ve leh mah se an pawt ding zo tawh lo.
Champion tlang nghal mai thei turin set lina tir lamah Luangmual an fal a, Hmingthazuali’n a vuak kai lo hnuah Biaki’n hlap tla ve thungin 11-6-in an sang. Diakkawnin Hmingthazuali la chhuakin Ngunkhunhniangi an luhtir a, danglamna lian tak a thleng.
Hniangi’n lehlam vuak dangin a hlap tla bawk a, point sarih a thawk chhuak. Kolasib team-in point 11 hmu zawnin 17-11-in an lehpel a, dinhmun tha an luah zui. VL Hmangaihzuali’n a hlap tlak ve leh hnuah 24-18-in an sang a, Rami’n vaw kai lovin set hnih ve ve an la.
An inthlauhna a tam loh avangin team pahnihin fei leh mar taka ke pen an harsat ve ve. A chak zawk chin felna hnuhnungah Luangmualin semifinal-a tawn hriat an neih tawh chhawrin lehlam aia thatho zawkin set ngana bul an tan a, Rami leh Biaki’n point inhmuh chhawkin 8-3-in an sang.
Tan hmun an inthlak rualin Diakkawnin an bei let a, Muani’n beiseina thar siamsakin 11-11 a nih hnuah boruak a sosang zual a, mipui au thawm a chawl lo. Net bulah Hniangi’n point hlohin Luangmual an sang thar leh a, hawi kir leh lovin Nunpuii’n a vuak tlak hnuah Hniangi’n a hlap kai lo va, point thum an hmu zawn.
Point khat hmuh belha champion thei turin hun tha vawi thum an nei a, player langsar ber Rami’n a vuak kai loh hnuah line tawkin inhnial theih takin a hlap tla a, vawi ruk a khelhah point 28 hlohin 81 a hlawh chhuahna a ni.
Pro Volleyball hmeichhe team chanchina la awm ngai lo thlentirin Luangmualin champion an lawm zui nasa. Jesse Lalpianpuia’n season a hmanpui vawi khatnaah hlawhtlinna chanpuiin KT Enterprise Best Coach chawimawina a dawng a, KT Enterprise Best Reiceiver-ah langsar lova pawimawh Esther Hmingthansangi thlan a ni bawk.
Diakkawnin an duhthusam ram thleng pha lo deuh mah se season chhia a ni lo a, an rilru natna khuh then turin Lalrinzuali’n KT Enterprise Best Setter chawimawina a dawng a, kut bengin championship an thlah liam bik lo.
STATS
LUANGMUAL
Lalramliani : point hmuh 22, point hloh 7
Lalbiakngheti : point hmuh 16, point hloh 4
Lalhriatpuii : point hmuh 10, point hloh 5
B Tlangmawii : point hmuh 6, point hloh 6
Remlalnghaki : point hmuh 0, point hloh 3
DIAKKAWN
Lalmuanpuii : point hmuh 18, point hloh 7
Vardingliani : point hmuh 16, point hloh 12
R Malsawmtluangi : point hmuh 10, point hloh 4
Ngunkhunhniangi : point hmuh 7, point hloh 2
VL Hmangaihzuali : point hmuh 4, point hloh 4
Hmingṭhazuali : point hmuh 4, point hloh 4
Flora Lalrinmawii : point hmuh 3, point hloh 0
Lalrinzuali (setter) : point hmuh 2, point hloh 2
MI MAL LAWMMAN :
KT Enterprise Best Spiker – Lalramliani (Luangmual)
KT Enterprise Best Setter – Lalrinzuali (Diakkawn)
KT Enterprise Best Reiceiver – Esther Hmingthansangi (Luangmual)
KT Enterprise Best Coach – Jesse Lalpianpuia (Luangmual)
FIXTURE – FINAL
May 31, zirtawpni 8:00pm :
HUNTHAR V TUICHANGRAL (mipa)
