Vawiin Dt 27.3.2023 hian Mizo Hnam Run Lungleiah, Lunglei Municipal Council inthlan “Campaign kharna” hun hman a ni a. He hunah hian MNF Adviser Lalruatkima chuan thusawiin, “Lunglei mipuite rilru kan lo hliam tawh zawng zawngah thupha kan chawi a ni,” a ti.
Lalruatkima chuan, “Kan theih ang angin Lunglei mipui tan hma kan la ve ṭhin nia kan inhre chungin, kawng hrang hrangin Lunglei mipuite duhkhawp kan ni lo tih kan hria a. Lunglei mipuite rilru kan lo hliam tawhna zawng zawngah Pathian hmingin thinlung takin thupha kan chawi a. Kan hliam hluite dam se kan va ti em!,” a ti a. “Lunglei changkang zawk leh hmasawn zawk dinpui turin Lunglei mipui zawng zawngte kan sawm che u a,” a ti bawk.
Lalruatkima chuan, “Leitlangpuiin khawvel zau zawk el pha tura rahbi thar a chhuankaina tur Lunglei Municipal Council inthlanah hian MNF vote vek turin kan sawm che u a. Mizorama sorkar mek, LMC dintu, MNF Party chhinchhiahna Arsi-ah lo vote vek turin thinlung takin kan sawm che u a ni,” a ti bawk.
He hunah hian mithar lawmluhna hun hman niin heng mite hi MNF-ah lawmluh an ni:
1. PB Lalthansanga General Secretary (I/c Election), Lunglei District Congress Committee
2. T Lalbuatsaihi – Secretary LDCC, Venghlun.
3. P Ronghaka – Secretary LDCC, Venglai.
4. K Hrangthantluanga, Farm Veng – ECM LDCC, ex Secretary LDCC & ex President NSUI Lunglei.
5. Lallawmsiama Chawngthu, Chanmar, Lunglei District Youth Congress Committee, General Secretary
Heng mite bakah hian voter 14 lawmluh an ni bawk.
He inkhawm hi Vanlalhmuaka, Campaign Committee Chairman-in a kaihruai a ni.
