Tukin zing dar 7:00 atang khan Hon’ble Home minister Pu K. Sapdanga chuan Lunglei Municipal area chhunga Home Dept. hnuaia establishment hrang hrang a tlawh.
Hrangchalkawna police out post, NH 54 siam avanga thiah tak hmunhma leh Police out post atana mimal in luah tura biak fel tawh a tlawh hmasa ber a. Tichuan 2nd BN MAP, Lungmual, Lunglei tlawh leh in, 2nd MAP Commandant Office kawta Martar te hriatrengna Lungphun-ah Martar te zahna pangpar a dah nghal. Amah an lo lawmna pual inkhawm tawiah thu sawiin, Home Minister chuan Police te hi kawng tin renga kan hmatheh te in ni a, kan hriat angin sawrkar hrang hrang kan lo hrawn tawh a, sawrkar hmasa ten theitawpin ram siam hna an lo thawk tawh thin a, amaherawh chu engkimah hian insiam that ngai vek kan ni a,theitawp chhuaha lo thawk tawhte an sulhnu chhuiin, engtin nge a aia tha zawk a kan thawh ang tiin, ram venhim hnaah te,civil hnaah te, development hnaah te, tih tur mitinin kan nei vek a ni. “Kalphung thar -mipui sawrkar” tiin sawrkar lo piang thar chuan au-hla a han siam a. Sawrkar kal tawhte an sitawm tihna ni lovin, kalphung thar zel din hi mihring te kalphung tur leh awm dan tur a ni a. Chungah chuan civil department hrang hrang te aiin Sipai te hi hma hruaitu tur kan ni. Chuvangin 2nd Bn MAP te hi Fitness leh Discipline-ah te Battalion dang te entawn tlak leh hmahruaitu ni turin ka beisei che u a, ka sawm bawk che u, a ni.
2nd BN MAP siamthat leh thuam that ngai lai te kan sawiho zel anga, theihtawp kan lo chhuah dawn a ni, a ti. Minister chuan kan Police station leh Battallion hrang hrang te , outpost te pawh ka tlawh nual tawh a. Kan police te atang hian siamthat hna hi a zuamawmin, a chakawm a ni, tih hi a takin ka hmu a ni.Chutiangah chuan 2nd Bn MAP te pawh hma hruaitu nitura lo inring turin ka besei che u a ni, a ti bawk.
Pu Francis Lalnuntluanga Ralte, Commandant 2nd Bn MAP chuan report tawi peiin, 2nd Bn MAP hi 7th Oct,1987 a din niin, tuna Luangmuala an awmna-ah hian kum 1989 atang khan an awm tan a, Commandant puitling 11 in an lo awm tawh a ni. District 3: Lunglei, Hnathial leh Serchhip District te an cover a, Mizoram pumpui area 28% vel an cover a ni, sanctioned strength 827 a nih laiin; tunah hian mi 528 an awm mek thu a tarlang bawk.
Hemi zawhah hian Minister hian District Jail tlawh lehin, Jail dinhmun leh thawmthat ngai lai en in, Male enclosure leh female enclosure te pawh a fang kual bawk a ni. Tun dinhmunah District Jail Lunglei Capacity hi Mipa-99 leh Hmeichhia-10 a ni laiin, Mipa-131 leh Hmeichhia-26 tang an awm mek a ni. January 2024 a tang average Population hi 157 a ni a, hei hi April 2023 hnua a hniam ber lai a ni.
Hemi zawhah hian LMC hmunhma tur tlawhin, chumi hnuah DIG(SR) office a tlawh a. Pu C.Lalthanmawia, IPS, DIG (SR) chuan an mamawh leh tul dang te Minister hnenah hian a lo thlen a ni. Tichuan Superintendent of Police office tlawhin, SP Pu Rahul Alwal, IPS chuan DEF Lunglei district te dinhmun leh an achievement te, an hmalakna hrang hrang leh an hmachhawp te Minister hi lo hrilhin, DEF Lunglei in an mamawh hrang hrang te Minister hnenah a lo thlen bawk a ni. Minister hian Zu leh drugs manna kawnga thawk tha District Special Branch(DSB) mi leh sa mi 5:
1. ASI Zothansanga——– —Citation + ₹2000/-
2. HC P.Lalchamliana—– —-Citation + ₹1600/-
3. Hon/HC Lilypawrmawii— Citation + ₹1600/-
4. Const Lalmanthanga——-Citation + ₹1200/-
5. Const Lalduhzuala——— Ciatation +₹1200/-
te hnenah chawimawina citation leh tangkafai lawmman a hlan hlawm bawk a ni.
Minister chuan a tawp berna atan Saikuti Hall-a Fire Station a tlawh bawk a ni. Minister hian Home dept. hnuaia establishment hrang hrang a tlawhna-ah hian an mamawh leh an harsatna hrang hrang an lo thlen te chu tha taka dawng sawngin, thei tawp chhuaha an harsatna leh mamawh an thlen te chu bawhzui a tum thu a hrilh hlawm a ni.
Vawiin Home Minister in Home Department hnuaia establishment hrang hrang a tlawhna-ah hian Pu T. Lalhlimpuia, Lunglei West Bialtu MLA, Pu Lalramliana Papuia, Lunglei South bialtu MLA, LMC Chairman leh LMC councillor te, DIG, DC,SP leh Head of Office te, MJA te leh ZPM party hruaitu thenkhatin an tawiawm a ni.
